ზუგდიდის მუნიციპალიტეტის საკრებულოს თავმჯდომარეს ორი მოადგილე ეყოლდება. ახლადარჩეულმა თავმჯდომარემ მამუკა წოწერიამ დეპუტატებს მოადგილეების პოზიციაზე თამაზ ფაცაცია და ბესიკ ჭეჟია წარუდგინა.მათ კანდიდატურებს 45 დეპუტატიდან მხარი 39-მა დაუჭირა. ერთ-ერთმა წევრმა სხდომა პირადი მიზეზის გამო დატოვა.



ენმ-ის წევრმა ანა წითლიძემ წოწერიას კითხვით მიმართა და სთხოვა განემარტა, თუ რა საჭიროა ორი მოადგილე და პრინციპით შეირჩნენ ისინი.

"ორი მოადგილის არჩევა არ არის განპირობებული, იმით რომ ეს რეალურად საჭიროა - საკრებულოს შეუძლია თავმჯდომარის ერთი მოადგილის პირობებშიც განახორციელოს თავისი საქმიანობა. უბრალოდ საუბარია იმაზე, რომ ხელოვნურად იზრდება ბიუროკრატიული ხარჯები, რადგან ეს ადამიანები მათი მაფიის წევრები არიან და აუცილებელია მათი დასაქმება", - აღნიშნა წითლიძემ.

თავის მხრივ, წოწერიამ ოპოზიციური პარტიის წარმომადგენელს უპასუხა, რომ საკრებულოს გამართული მუშაობისთვის ასე თვლის სააჭიროდ.

"კანონით, ადგილობრივი თვითმმართველობის შესაბამისად იმ მუნიციპალიტეტებში სადაც მოსახლეობა 100 000 აღემატება შესაძლებელია თავმჯდომარეს ჰყავდეს 2 მოადგილე, შესაბამისად მე წარვადგინე 2 კანდიდატურა. დარწმუნებული ვარ ამ ორი ადამიანის საქმიანობა იქნება ეფექტური ჩვენი მუნიციპალიტეტისთვის", - განაცხადა წოწერიამ.

თამაზ ფაცაცია, კულტურისა და ახალგაზრდული საკითხების მიმართულებით იმუშავებს, ხოლო ბესიკ ჭეჟია ფინანსებსა და ეკონომიკის საკითხებს გაუწევს კურირებას.