2018 წლის 12 ივნისს, ნიუ-იორკში გაეროს გენერალურმა ასამბლეამ კიდევ ერთხელ მიიღო საქართველოს მიერ ინიცირებული რეზოლუცია "აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ". 72 - ე სესიაზე რეზოლუციას მხარი 81- მა ქვეყანამ დაუჭირა, 16 კი წინააღმდეგი იყო.

მხარდამჭერ ქვეყანას შორის არიან ევროკავშირის სახელმწიფოები, აშშ, კანადა, მექსიკა, ცენტრალური ამერიკის, კარიბის ზღვის აუზის, ახლო აღმოსავლეთის და აფრიკის რამდენიმე ქვეყანა, ავსტრალია, ახალი ზელანდია, იაპონია, თურქეთი, ალბანეთი, აზერბაიჯანი, მოლდოვა და უკრაინა.

რეზოლუციას ხმა წინააღმდეგ მისცეს რუსეთმა, სომხეთმა, ბელორუსიამ, კუბამ, ჩრდილოეთ კორეამ, ნიკარაგუამ, ვენესუელამ, ლაოსმა, მიანმარმა, ნაურუმ, ფილიპინებმა, სუდანმა, სამხრეთ სუდანმა, ვიეტნამმა, ბურუნდიმ და ზიმბაბვემ.

საქართველოს მიერ ინიცირებული რეზოლუციის მხარდამჭერთა შორის არიან ვანუატუ და ტუვალუ.

ვანუატუმ და ტუვალუმ საქართველოს ოკუპირებული რეგიონების – აფხაზეთისა და ცხივნალის რეგიონის დამოუკიდებლობა 2011 წელს აღიარეს. თუმცა აღნიშნული გადაწყვეტილება ვანუატუმ 2013 წელს გააუქმა, ხოლო ტუვალუმ –2014 წელს.

მიუხედავად ამისა დე ფაქტო აფხაზეთის საგარეო საქმეთა მინისტრი დაურ კოვე მედიის წარმომადგენლებსა და აფხაზურ საზოგადოებას ატყუებს და აცხადებს, რომ "საუბრები იმის შესახებ, რომ ვანუატუმ და ტუვალუმ გადაწყვეტილებები უკან გაიწვიეს, სიმართლეს არ შეესაბამება", წერს "ნაშა აბხაზია".

რეზოლუციაში აღნიშნულია უმაღლესი კომისრის 2017 წლის ანგარიშში მოცემული შეფასებები და ხაზგასმულია საქართველოს რეგიონებში ეფექტური კონტროლის მქონე ძალის პასუხისმგებლობა - უზრუნველყოს ადგილზე ადამიანის ფუნდამენტური უფლებებისა და თავისუფლებების დაცვა. რეზოლუციაში ადამიანის უფლებათა საბჭო გამოთქვამს სერიოზულ შეშფოთებას საქართველოს აფხაზეთისა და ცხინვალის რეგიონებში ეთნიკური ნიშნით დისკრიმინაციას, მშობლიურ ენაზე განათლების მიღების შეზღუდვასა და ეთნიკურად ქართველი მოსახლეობის სახლების მიზანმიმართულ ნგრევასთან დაკავშირებით. ამასთანავე, გამოთქმულია შეშფოთება, რომ იძულებით გადაადგილებული პირები და ლტოლვილები, კვლავაც ვერ ახერხებენ თავიანთ საცხოვრებელ სახლებში უსაფრთხოდ და ღირსეულად დაბრუნებას.

დოკუმენტში ნათქვამია, რომ რეგიონულ და საერთაშორისო მონიტორინგის მექანიზმებს არ ეძლევათ აფხაზეთისა და ცხინავლის რეგიონებში შესვლის საშუალება. აღნიშნულიდან გამომდინარე, რეზოლუციაში არის მოწოდება - მოხდეს უმაღლესი კომისრის ოფისისა და მონიტორინგის სხვა მექანიზმების დაუყოვნებლივი შეღწევის უზრუნველყოფა. ამასთან, ადამიანის უფლებათა საბჭო, მიღებული რეზოლუციით ავალებს გაერო-ს ადამიანის უფლებათა უმაღლეს კომისარს, განაგრძოს საქართველოსთვის ტექნიკური დახმარების გაწევა და წარმოადგინოს ანგარიში რეზოლუციაში ასახულ საკითხებთან დაკავშირებით, საბჭოს მომდევნო - 38-ე და 39-ე სესიებზე.