აფხაზეთის დე ფაქტო რესპუბლიკის საგარეო საქმეთა სამინისტრო „ტატუნაშვილი - ოთხოზორიას სიის“ შესახებ საკითხს გალის შეხვედრაზე დააყენებს. უწყება სიის დამტკიცებას სპეციალური განცხადებით გამოეხმაურა. დე ფაქტო რესპუბლიკა აღნიშნულთან დაკავშირებით სერიოზულ აღშფოთებას გამოხატავს. მათი შეფასებით, საქართველოს მთავრობის, კერძოდ კი პრემიერ-მინისტრის მამუკა ბახტაძის ქმედება დესტრუქციულია.

„ეს სია ატარებს პროვოკაციულ ხასიათს და შესაძლოა, სრულად ჩაშალოს ჟენევის საერთაშოროსო მოლაპარაკებები, რომელიც მიმართულია არსებული კონფლიქტების მოგვარებაზე სამხრეთ კავკასიაში. პრემიერ- მინისტრის განცხადებით კიდევ ერთხელ ხდება საქართველოს ხელისუფლების მიერ აგრესიული პოლიტიკის დემონსტრირება აფხაზეთისა და აფხაზეთის მოქალაქეების მიმართ, რაც სერიოზულად უშლის ხელს არსებული მოლაპარაკებების პროცესს. ქართული მხარე, ყოველგვარი ობიექტური საფუძვლის გარეშე ადანაშაულებს ადამიანის უფლებათა დარღვევაში აფხაზეთისა და ოსეთის მოქალაქეებს და შეჰყავს ისინი „შავ სიაში“, რომელიც საერთაშორისო სანქციების დაწესების წინაპირობაა“, - აღნიშნულია განცხადებაში.

აქვე ნათქვამია, რომ აფხაზური მხარე  საერთაშორისო მოლაპარაკების სრულად ჩაშლაზე პასუხისმგებლობას პრემიერ-მინისტრ მამუკა ბახტაძეს აკისრებს.

საქართველოს მთავრობამ „ოთხოზორია-ტატუნაშვილის სიის“ შესახებ დადგენილების პროექტი მთავრობის გუშინდელ სხდომაზე დაამტკიცა, რომელიც პარლამენტს გაეგზავნა. მანამდე პრემიერ-მინისტრმა მამუკა ბახტაძემ განაცხადა, რომ აღნიშნულ სიაში ამ ეტაპზე 33 პირია შესული. მისივე თქმით, ისინი 1991 წლიდან დღემდე მხილებულნი არიან ოკუპირებულ ტერიტორიებზე საქართველოს მოქალაქეების წინააღმდეგ ჩადენილ მკვლელობაში, გატაცებასა, წამებაში და ამ დანაშაულთა დაფარვაში.


გიგა ოთხოზორიას მკვლელობა კვლავ გალის შეხვედრის მთავარი თემა იქნება

„ოთხოზორია-ტატუნაშვილის სია"-ში 33 ადამიანია - მთავრობამ დადგენილება დაამტკიცა