ზუგდიდში პარკირების სისტემის მოსაწესრიგებლად სამუშაო ჯგუფის პირველი შეხვედრა გაიმართა. როგორც საკრებულოს თავმჯდომარემ მამუკა წოწერიამ ჟურნალისტებს უთხრა, დღევანდელ სხდომაზე „თაუნ პარკთან“ დადებული ხელშეკრულებებისა და ტარიფების დადგენის დოკუმენტის გაცნობა და გადახედვა იყო დაგეგმილი.

„შევიკრიბებით, რათა მივიღოთ პარკირების წესი, რომელიც ხელს შეუწყობს ამ საკითხის მოგვარებას და მაქსიმალურად ყველა მხარის ინტერესების დაცვას“ , - თქვა წოწერიამ.

კომიისის ერთ-ერთი წევრის „საერთაშორისო გამჭვირვალობა-საქართველოს“ ადგილობრივი ოფისის კოორდინატორის არჩილ თოდუას ინფორმაციით, შემდეგი სხდომა უახლოეს ერთ კვირაში დაიგეგმა, სავარაუდოდ, აგვისტოს ბოლომდე კი საბოლოო პროგრამა შეიქმნება, რომელიც დაადგენს, როგორ უნდა იმუშაოს პარკირების სისტემამ გამართულად.

შპს „თაუნ პარკმა“ ზუგდიდის ბიუჯეტში დავალიანება და ჯარიმა 55 000 ლარის ოდენობით სრულად გადაიხადა. მანამდე კომპანიამ მიმდინარე წლის თებერვალში ადგილობრივ ბიუჯეტში 51 411 ლარის ოდენობით შეიტანა. რადიო "ათინათის" მიერ მერიიდან გამოთხოვილი ინფორმაციის თანახმად, კომპანიამ დავალიანება ივნისამდე სულ ოთხჯერ - იანვარსა (ერთხელ კვარტალური თანხა და 2 ჯარიმა) და თებერვალში გადაიხადა, რაც ჯამში 107 669 ლარს უდრის.

კომპანიას, რომელმაც ზუგდიდში პარკირების სისტემა უნდა მოაწესრიგოს, ტერიტორიები ათწლიანი იჯარით აქვს აღებული. ადგილობრივ ბიუჯეტში „თაუნ პარკმა“ კვარტალურად, ჯამში ყოველწლიურად 203 000 ლარი უნდა შეიტანოს. შესაბამისი ხელშეკრულება ქალაქ ზუგდიდის მუნიციპალიტეტსა და კომპანია „თაუნ პარკს“ შორის 2017 წლის სექტემბერში დაიდო.


ამავე თემაზე:

„თაუნ პარკმა“ დავალიანება დაფარა