ზუგდიდი 4 მაისს დაგეგმილ აქციას სახელწოდებით "ცირკი ცხოველების გარეშე'' უერთდება. ორგანიზატორების თქმით,  მიუღებელია ცირკში ცხოველების მონაწილეობა და მათზე ძალადობა. მათივე განმარტებით, არსებობს მრავალი დოკუმენტური მასალა სადაც ისინი მათთვის შეუსაბამო და მძიმე პირობებში იმყოფებიან.  

„მოგეხსენებათ 4 მაისს თბილისს ეწვევა მოსკოვის იური ნიკულინის ცირკი. მათ საცირკო წარმოდგენებში აქტიურად ხდება ცხოველების (მაიმუნები, ლომები, ვეფხვები, ძაღლები) გამოყენება. მრავალი დოკუმენტური მასალა არსებობს იმის დასადასტურებლად, რომ ცირკებში ცხოველები მათთვის შეუსაბამო და აუტანელ გარემო-პირობებში იმყოფებიან. მოგზაურ ცირკებში გამოყენებული გარეული ცხოველებისთვის კი განსაკუთრებით მწვავედ გადასატანია მომთაბარე ცხოვრება. ამასთან, ე.წ ,,ცირკის ცხოველებს“ უწევთ იმგვარი მოქმედებების შესრულება, რაც მათ ბუნებრივ მდგომარეობას არ შეესაბამება. ცირკებში ცხოველების გასაწვრთნელად და მათ მიერ კონკრეტული ქცევის/ილეთის დასასწავლად გამოიყენება ისეთი ძალადობრივი მეთოდები, როგორებიცაა: დიდი ხნის განმავლობაში საკვებისა და წყლის გარეშე დატოვება, იძულება, ტკივილის მიყენება (მათ შორის ჯოხების, ბასრი, მჩხვლეტავი საგნების, ელექტროშოკერების გამოყენებით), ფსიქოლოგიური ზეწოლა, წამება, დიდი ხნის განმავლობაში დაბმა, სხვა ცხოველებისგან იზოლაცია, პატარა ზომის გალიებში გამოკეტვა და ა.შ. მდგომარეობას ამძიმებს ისიც, რომ ისინი განთავსებულნი არიან ანტისანიტარიულ პირობებში, ხოლო, მათი სამედიცინო საჭიროებები ხშირად უგულებელყოფილია. აღსანიშნავია, რომ მსოფლიოს მასშტაბით ცირკებში ცხოველების გამოყენების ტენდენცია თანდათან კლებულობს. მეტიც, უფრო და უფრო მეტად პოპულარი ხდება საცირკო დასები ცხოველების გარეშე, რომლებიც საინტერესო და ამაღელვებელ შოუებს სთავაზობენ მაყურებელს. მათ შორისაა: Cirque du Solei, Circus Vargas, Circus Oz, Cirque Productions“, - ნათქვამია ღონისძიების ორგანიზატორების მიერ გავრცელებულ განცხადებაში.

თბილისის პარალელურად აქცია ზუგდიდში 4 მაისს ცენტრალურ ბულვარში 17:00 საათზე გაიმართება.