ზუგდიდში, ავტობუსის გაჩერებებზე საქართველოს ყოფილი პრეზიდენტის მიხეილ სააკაშვილისა და ზუგდიდის მერობის კანდიდატის სანდრა რულოვსის ფოტოები გამოჩნდა. ფოტოების ნაწილზე რულოვსის წიგნიდან ციტატაა ამობეჭდილი, რომელშიც ის ზვიად გამსახურდიას შესახებ საუბრობს და მას ბანდფორმირების ხელმძღვანელად მოიხსენიებს. სააკაშვილის ფოტოს მინაწერში კი აღნიშნულია, რომ 1992 წელს გამოქვეყნებულ სტატიაში სააკაშვილი გამსახურდიას „უღირს პრეზიდენტსა“ და „კავკასიელ ჰუსეინს“ უწოდებს.

უცნობია, ვინ განათავსა აღნიშნული წარწერები გაჩერებებზე. სავარაუდოდ, ის წინასაარჩევნოდ რულოვსის კანდიდატურის წინააღდმდეგაა მიმართული.

სანდრა რულოვსმა უფრო ადრე განმარტა, რომ წიგნი, რომელშიც ის ზვიად გამსახურდიასაც ახსენებს, ავტობიოგრაფიულია და არ წარმოადგენს საქართველოს უახლესი ისტორიის სამეცნიერო ნაშრომს. მან ჟურნალისტებს უთხრა, რომ კიდევ ერთ წიგნს ამჯერად, განსხვავებულად დაწერს, რადგან გამსახურდიას შესახებ ასე არ ფიქრობს.