ზუგდიდის ტექნოპარკში გაეროს ქალთა ორგანიზაცია და ბიზნეს ლიდერთა ფედერაცია „ქალები მომავლისთვის“ ორდღიან ეკონომიკურ ფორუმს მასპინძლობენ. ფორუმის მიზანია რეგიონის ეკონომიკურ საქმიანობაში ქალების გაძლიერება და აქტიური ჩართულობა. ქალ მეწარმეებს საშუალება აქვთ, საქმიანობის გაფართოებისთვის საჭირო კონსულტაციები თუ რჩევები მიიღონ. 

„ორდღიანი ფორუმი, რომელიც დღეს გაიხნა, გრძელდება 21-22 ივლისის ჩათვლით. ეს არის რიგით მესამე ფორუმი. ვმასპინძლობთ ქალ მეწარმეებს და სხვა ქალებსაც, რათა მათ უფრო მეტი გაიგონ, თუ რა შესაძლებლობებს სთავაზობს მათ სახელმწიფო თავიანთი სფეროს განსავითარებლად.ჩამოდიან ბიზნეს კონსულტანტები, რომლებიც ქალებს დაეხმარებიან ბიზნესის გამართვაში. ძალიან მნიშვნელოვანია და ჩვენ აქცენტს ვაკეთებთ ტურიზმის განვითარებაზე, გამომდინარე აქედან გვეყოლება სპეციალისტების ტურიზმის სააგენტოდან“, - აღნიშნა ფორუმის ერთ-ერთმა ორგანიზატორმა, გაეროს ქალთა ორგანიზაციის კომუნიკაციების სპეციალისტმა, გვანცა ასათიანმა.

ღონისძიების მიმდინარეობისას წარმოდგენილი იქნება ინფორმაცია ქალებისთვის ხელმისაწვდომი ტრენინგების, საგრანტო პროგრამების, განათლების მიღებისა და დასაქმების შესაძლებლობების შესახებ.

ფორუმის პირველი დღე გაეროს ქალთა ორგანიზაციის პროგრამის ხელმღვანელი იენი რატილაინენმა, ბიზნეს ლიდერთა ფედერაცია "ქალები მომავლისთვის" სამეთვალყურეო საბჭოს წევრი ქეთევან ქვარცხავამ და ადგილობრივი ხელისუფლების წარმომადგენლებმა გახსნეს.  იენი რატილაინენის თქმით, საქართველოში ქალები და მამაკაცები ვერ სარგებლობენ თანაბარი პირობებით და ამასთან მათ ხელფასებს შორის დიდი  სხვაობაა.

„ამ ფორუმის ძირითადი მიზეზი არის ქალთა ეკონომიური გაძლიერება, მიუხედავად იმისა, რომ საქართველო წარმოადგენს ძალიან ლამაზ ქვეყანას და აქვს ტურისტული პოტენციალი. სამწუხაროდ უნდა ითქვას, რომ ქალები და მამაკაცები თანაბარი შესაძლებლობებით არ სარგებლობენ. საქართველოში არსებობს დიდი სახელფასო სხვაობა. ეს ფორუმი ქალებს საშუალებას აძლევს ჰქონდეთ ერთმანეთთან კომუნიკაცია და მათ შესაძლებლობას მიეცემათ წახალისდნენ სხვა წარმატებული ქალების მაგალითზე“, - აღნიშნა მან.

ქალების ეკონომიური გაძლიერების აუცილებლობაზე ისაუბრა ზუგდიდის მუნიციპალიტეტის მერმა გიორგი შენგელიამ. მისი თქმით, ისინი მთავრობის მხრიდან ყოველთვის იქნებიან წახალისებული.

პირველი ორი რეგიონული ფორუმი ქუთაისსა და ბათუმში გაიმართა.