„ევროპული საქართველოს“ წევრი ლელა ქებურია აუდიტის სამსახურის მიერ ზუგდიდის მუნიციპალიტეტის მიერ უსახლკარო პირთა საცხოვრებელი ფართით უზრუნველყოფის პროგრამაში ხარვეზების გამოვლენას გამოეხმაურა. როგორც მან ბრიფინგზე აღნიშნა, 50 ათას ლარამდე ღირებულების ინფრასტრუქტურულ პროექტებში თანხა გაფლანგულია. პარლამენტარი მიიჩნევს, რომ აქ შესაძლოა, კორუფციული ინტერესები იკვეთებოდეს.

„მინდა თქვენი ყურადღება მივაპყრო პროექტს, რომელიც ეხება უსახლკარო და მძიმე საცხოვრებელი პირობების მქონე პირების საცხოვრებელი ფართების პრობლემას. ჩვენი გაჭირვებული მოსახლეობა განსაკუთრებული ზრუნვის ობიექტი უნდა იყოს იმ ფონზე, რა მძიმე სოციალური პირობებიც არის ქვეყანაში. ეს პროექტი ძალიან კარგია, რომ არის მუნიციპალიტეტში. მოგეხსენებათ, ყველა მუნიციპალიტეტს არ აქვს ფუფუნება მსგავსი ტიპის პროექტი განახორციელოს. ამ მიმართულებით ზუგდიდის მუნიციპალიტეტში დაგეგმილი იყო 47 სახლის მშენებლობა და მილიონ ლარამდე იყო გამოყოფილი, თუმცა, აუდიტის სამსახურმა გამოავლინა, რომ ასეთი მნიშვნელოვანი პროექტიც კი ხარვეზებით ხორციელდება. თუმცა, ობიექტების დათვალიერების შედეგად გამოვლინდა, რომ რამდენიმე სახლი, რომელიც ბენეფიციარებისთვის აშენდა არ გამოიყენება საცხოვრებლად და არის დაკეტილი. პროექტის ბენეფიციარების შერჩევისას იყო ხარვეზები და ისინი არ შეირჩნენ საჭიროების მიხედვით. რამდენიმე სოფელში სამუშაოები დაგვიანებით მიმდინარეობდა და 17 სახლამდე არის ხარვეზით შესრულებული. მუნიციპალიტეტმა ეს ხარვეზით ან ნახევრად შესრულებული სამუშაოები ჩაიბარა, მიუხედავად იმისა, რომ ამ სამუშაოების ხარვეზი ვიზუალური დათვალიერებითაც იყო შესაძლებელი. სამუშაოების შესრულების თითქმის ყველა ეტაპზე იყო ხარვეზები, დაგეგმვის, ბენეფიციარების გამოვლენის, სამუშაოებზე ზეგავლენისა და შეჯამების მიმართულებით. ეს საუკეთესო შემთხვევაში არის არაპროფესიონალიზმი, ხოლო უარეს შემთხვევაში არის კონკრეტული პირების და კორუფციული ინტერესები“, - ამბობს ქებურია.

კორუფციულ ინტერესებზე საუბრისას ქებურიამ რამდენიმე კომპანიაც დაასახელა, მათ შორის შპს „ევრომშენი 999“, რომლის მესაკუთრე და 100%-იანი წილის მფლობელი, მისივე თქმით, 2016 წლის მონაცემებით არქიტექტურის სამსახურის უფრო იყო.

აუდიტის სამსახურმა ზუგდიდის მუნიციპალიტეტში 2017-2018 წლებში განხორციელებული ინფრასტრუქტურული პროექტების განხორციელების კუთხით ხარვეზები გამოავლინა. კერძოდ, დასკვნის მიხედვით, ნაკლოვანებები უსახლკარო პირთა საცხოვრებელი ფართით უზრუნველყოფის პროგრამაში აღმოჩნდა.

ზუგდიდის მერიაში ამბობენ, რომ მშენებელ ორგანიზაციებს ხარვეზების აღმოსაფხვრელად ვადები განესაზღვრათ.