საქართველოს პრეზიდენტმა სამეგრელო-ზემო სვანეთის სამხარეო ადმინისტრაციაში რეგიონის მერებთან და მხარის გუბერნატორთან შეხვედრა გამართა. ის ჟურნალისტებისთვის დახურული იყო. მანამდე, მოძრაობა „შეცვალეს“ აქტივისტებმა საპროტესტო აქცია გამართეს, მათ სალომე ზურაბიშვილისთვის შეკმაზული ლობიოს და მწვანე ხახვის გადაცემა სცადეს, თუმცა ამის საშუალება სამართალდამცავებმა არ მისცეს. შეხვედრის დასრულების შემდეგ საქართველოს პრეზიდენტმა ჟურნალისტებთან კომენტარი გააკეთა.

„მნიშვნელოვანია, რომ პრეზიდენტმა კარგად გაიცნოს რეგიონში არსებული პრობლემები და წარმატებები. ამ ყველაფრის შესახებ  დღეს ვრცლად მოვისმინე და ძალიან ბედნიერი ვარ იმით, რაც მოვისმინე, რამდენი წარმატებაა სამეგრელოში და რამდენი საინტერესო პოტენციალი. ჯერჯერობით ვაგრძელებ საქმიანობას რეგიონებში, რამეთუ ის ხალხმრავლობასთან არ არის დაკავშირებული. ვთვლი, რომ პანიკა არ უნდა იყოს, უნდა იყოს სიფრთხილე. მოსახლეობას რაღაც განცდა უნდა მივცეთ, ის რაც შეიძლება, ყველაფერი გრძელდება, საქმიანობა არ არის შეწყვეტილი.  თუმცა, როგორც იქნება მითითებები, მეც დავემორჩილები. თუ უცხოეთში ვიზიტები შეიზღუდება, შეიზღუდება ჩემი ვიზიტებიც“, - განაცხადა ზურაბიშვილმა.

საქართველოს პრეზიდენტი მოსახლეობას მიმართავს და ამბობს, რომ შესაძლებელია, სახელმწიფომ რეგულაციები დააწესოს და მას უნდა დავემორჩილოთ.

„საბოლოო ჯამში, ყველაზე მთავარი არის მოქალაქეების თვითშეგნება. თითოეული მოქალაქე პასუხისმგებელია თავის ოჯახზე, თავის ირგვლივ მყოფ ადამიანებზე. საქართველო ჯერჯერობით არის სამაგალითო ყველა მიღებული ზომებით. ჩვენ გვაქვს უზარმაზარი შანსი, რომ ამ ქვეყანაში არსებობს ლუგარის ცენტრი, რომელიც არის სამაგალითო.არამხოლოდ აქ, არამხოლოდ რეგიონში, არამედ მსოფლიოში. ვიღაცეები თუ ებრძვიან ლუგარის ცენტრს, ესეც მოდის იქიდან, საიდანაც ჩვენ გვებრძვიან საერთოდ. გვახსოვს გასულ წელს როგორი  ჭორები იყო გავრცელებული ლუგარის ცენტრზე.  ჩვენ უნდა ვიცოდეთ, რომ დავაფასოთ ის, რაც გვაქვს ქვეყანაში და ამიტომ მე ვიქნები ბოლომდე დამცველი, მაგრამ დაცვა არ სჭირდება, რადგან მათი საქმე ლაპარაკობს მათზე. პირადად მადლობა მინდა გადავუხადო ბატონ გამყრელიძეს, ბატონ იმნაძეს და ყველა თანამშრომელს, რომელიც იქ მუშაობს და ასევე, ყველა მედ-პერსონალს, რომელიც დღე და ღამე მუშაობს იმისთვის, რომ დაძლეულ იქნას ეს მსოფლიო ჭირი“, - თქვა პრეზიდენტმა.

ზურაბშვილს დღეს რამდენიმე შეხვედრა აქვს დაგეგმილი, მათ შორის, პრეზიდენტი ზუგდიდელ ახალგაზრდა გიგი სიჭინავას სახელოსნოს ეწვევა.