ზუგდიდში, სამხარეო ადმინისტრაციის მიმდებარე ტერიტორიაზე, სავარაუდოდ, გვიან ღამით პრესის ჯიხური გაქურდეს. ადგილზე მომუშავე ქალის ინფორმაციით, დილით მას ჯიხურის მინა ჩამტვრეული დახვდა.

"როგორც მითხრეს წუხელ გვიან შუქი არ იყო, სავარაუდოდ მაშინ მოხდა", - გვითხრა მან.  

არსებული ინფორმაციით, წაღებულია დაახლოებით 300 ლარამდე ღირებულების საქონელი.

შს სამინისტრომ აღნიშნულ საქმეზე გამოძიება სს კოდექსის 187-ე მუხლის 1-ლი ნაწილით დაიწყო, რაც ნივთის დაზიანებას ან განადგურებას გულისხმობს. უწყებაში რადიო "ათინათს" განუმარტეს, რომ გამყიდველი პოლიციასთან საუბარში ქურდობის შესახებ ინფორმაციას უარყოფს.

შსს-ს პასუხის შემდეგ, ვცადეთ გამყიდველთან დაკავშირება, თუმცა ის ჩვენს ზარებს არ პასუხობს.