სამეგრელო-ზემო სვანეთიდან "122"- ში ხანძრების შესახებ 40-ზე მეტი შეტობინება შევიდა. ინფორმაციას საგანგებო სიტუაციების მართვის სამსახური ავრცელბს. ამავე ცნობით, რეგიონში ვითარებას ძლიერი ქარი ართულებს და მეხანძრე-მაშველებს ცეცხლის ლოკალიზებაში უშლის ხელს. არის საფრთხე, რომ ხანძარი თხილის პლანტაციებში გავრცელდეს. როგორც სააგენტოში ამბობენ, დახმარების მიზნით გურიიდან, აჭარიდან და იმერეთიდან ხდება დამატებითი ძალების და სახანძრო ტექნიკის მობილიზება.

"საზოგადოებრივი უსაფრთხოების მართვის ცენტრ "112"-ში სამეგრელო-ზემო სვანეთის მუნიციპალიტეტიდან შემოსულია 40-ზე მეტი შეტყობინება მინდვრის ხანძრების შესახებ. ცეცხლი, ძირითადად, უკიდია ბალახს და ეკალბარდს. ყველა შემთხვევაზე მომხდარია რეაგირება. ადგილებზე იმყოფებიან მეხანძრე-მაშველები და მიმდინარეობს სალოკალიზაციო-სალიკვიდაციო სამუშაოები.

ძლიერი ქარის გამო, რამდენიმე კერაზე არსებობს პლანტაციებსა და ნარგავებზე ცეცხლის გადასვლის საფრთხე. პრევენციისა და დახმარების მიზნით გურიიდან, აჭარიდან და იმერეთიდან ხდება დამატებითი ძალების და სახანძრო ტექნიკის მობილიზება.
შინაგან საქმეთა სამინისტროს საგანგებო სიტუაციების მართვის სამსახური მოუწოდებს მოსახლეობას თავი შეიკავონ მინდვრებში და სახნავ მიწებზე ბალახის დაწვისგან. დასავლეთ საქართველოში ძლიერი ქარია და მშრალი ამინდი, რაც ხელს უშლის მეხანძრე-მაშველებს ხანძრების სალიკვიდაციო სამუშაოებში.

მინდორში და სახნავ მიწებზე ბალახის დაწვამ შეიძლება გამოიწვიოს ხანძრის გავრცელება როგორც საცხოვრებელ სახლებზე, ასევე, ტყის მასივებზე", - ნათქვამია სააგენტოს მიერ გავრცელებულ ინფორმაციაში.

ძლიერი ხანძარია ზუგდიდის სოფლებში, დავითიანსა და ნარაზენში.