გალის რაიონში ნაგავსაყრელზე კრიტიკული მდგომარეობაა, ხოლო ახალი პოლიგონი, რომელიც 2021 წლიდან გულრიფშის რაიონში უნდა მოწყობილიყო, ჯერ არ აშენებულა. ის სავარაუდოდ, მხოლოდ 2022 წლისთვის ამოქმედდება. ამის შესახებ "ეხო კავკაზას" ე.წ. ადმინისტრაციის ხელმძღვანელმა კონსტანტინე ფილიამ უთხრა. მან აღნიშნა, რომ ნაგავსაყრელის სიახლოვის გამო, გალის რაიონის მოსახლეობამ არაერთხელ გამოთქვა უკმაყოფილება და აქციებითაც იმუქრებოდა, თუმცა, ჯერჯერობით, დე ფაქტო ხელისუფლება პრობლემას ვერ აგვარებს. 

ფილიას თქმით, არიან ადგილობრივი მეწარმეები, რომლებიც მათ ნარჩენების დაპაკეტებას და ენგურის გავლით გატანას სთავაზობენ. 

"კარგი თემაა, თუ გამოვიდა. თუ ამას ხელი არ შეუშალა ზოგიერთმა ფსევდოპოლიტიკოსმა, რომელიც თვლის, რომ მდინარე ენგურზე უნდა გაითხაროს ორმო, რომელიც შემოიღობება... ჯერჯერობით, ეს წინადადებები განხილვის ეტაპზეა, გადაწყვეტილება არ მიგვიღია... ეს კომერციული შემოთავაზებაა, არის გარკვეული პირობები ჩვენი მხრიდან, ხარჯის ნაწილში. ჯერ ვერაფერს ვიტყვი", - ამბობს ფილია.

სოხუმიდან გალის რაიონის სოფელ მზიურის ნაგავსაყრელზე საყოფაცხვრებო ნარჩენების გატანა "ხელისუფლებამ" 2019 წლის აპრილში გადაწყვიტა. მაშინ აფხაზეთის დე ფაქტო რესპუბლიკის ეკოლოგიისა და ბუნების დაცვის კომიტეტის წარმომადგენელმა საველი ჭითანავამ ადგილობრივ მედიას განუცხადა, რომ ეს დროებითი ზომაა და ნაგავსაყრელისთვის ადგილი უკვე შერჩეულია გულრიფშის რაიონში, სადაც გეოლოგიური კვლევები ჩატარდება.

თავის მხრივ, გალის რაიონის "ადმინისტრაციის" იმდროინდელმა ხელმძღვანელმა თემურ ნადარაიამ აღნიშნა, რომ ეს წინადადება მათთვის უფრო მომგებიანია, ვიდრე სოხუმისთვის.

"ეს გალის რაიონსაც აწყობს, რადგან ჩვენ მათი ნარჩენების უტილიზაციასაც მოვახდენთ. ჯერჯერობით, სახსრები ჩვენი ბიუჯეტიდან გამოიყოფა, თუმცა მთავრობა დახმარებას გვპირდება, რადგან ჩვენი ხარჯები ორჯერ გაიზრდება", - განაცხადა ნადარაიამ.

სოხუმში, მაიაკის რაიონში არსებული ნაგავსაყრელი ადგილობრივი მცხოვრებლების მოთხოვნით დაიხურა.