რუსეთი გეგმავს ეტაპობრივად შეუმციროს დაფინანსება აფხაზეთისა და სამხრეთ ოსეთის ოკუპირებული რეგიონებს. ამის შესახებ რუსეთის ეკონომიკური განვითარების მინისტრის მოადგილემ, დიმიტრი ვოლვაჩმა TASS- თან ინტერვიუში ისაუბრა.

"ახლა ჩვენ ერთი ამოცანა გვაქვს, რომ თქვენ ჩვენგან მეტი კი არ მიიღოთ, არამედ, პირიქით, თანდათან უფრო დამოუკიდებლები გახდეთ. ანუ, გვინდა ეტაპობრივად შევამციროთ ხელფასების გათანაბრების მხარდაჭერა, მაგრამ გავაკეთოთ ისე, რომ ხელფასები არ შემცირდეს", - უთხრა გამოცემას ვოლვაჩმა.

გამოცემის კითხვაზე, თუ რას ითვალისწინებს სამომავლო გეგმები ოკუპირებული რესპუბლიკების დახმარების თვალსაზრისით, ის პასუხობს, რომ ეკონომიკის ზრდისთვის, თავიანთი ბიუჯეტების გასაზრდელად ოკუპირებულმა რეგიონებმა ინვესტიციები უნდა მოიზიდონ, გაამრტივონ რეგულაციები და გააუმჯობესონ საინვესტიციო გარემო.

"გვინდა, რომ მათი მშპ გაიზარდოს, ბიუჯეტის უსაფრთხოება გაიზარდოს და პირიქით, შემცირდეს მათი დამოკიდებულება რუსეთის სუბსიდიებზე. მაგალითად, რესპუბლიკებში სახელმწიფო სექტორში დასაქმებულთა ხელფასების ზრდის თვალსაზრისით რუსეთის თანადაფინანსების წილი თანდათან შემცირდება - 2022 წლის 85%-დან 2025 წლისთვის 15%-მდე. როგორ მივაღწიოთ ამას? აუცილებელია ინვესტორების მოზიდვა, გარდა ამისა, ყოველწლიურად იზრდება მათი ინტერესი რესპუბლიკების მიმართ. მაგრამ პირველ რიგში, ჩვენ უნდა შევცვალოთ რეგულაცია, გავაუმჯობესოთ საინვესტიციო კლიმატი, მოვიყვანოთ ინვესტორები, გავამარტივოთ საბაჟო რეგულირება და გავაუმჯობესოთ საგადასახადო რეგულირება", - ამბობს ვოლვაჩი.

ინტერვიუში ის საუბრობს იმ დახმარებაზე, რომელიც რუსეთმა აფხაზეთს გაუწია. მისი მონაცემებით, ამ დროის განმავლობაში აფხაზეთში 500 -ზე მეტი ობიექტია რეკონსტრუირებული. მხოლოდ 2021 წელს აფხაზეთისთვის რუსულმა ფინანსურმა დახმარებამ 5 მილიარდ რუბლზე მეტი შეადგინა.

"შარშან ჩვენ ამაზე ვიფიქრეთ, ვესაუბრეთ რესპუბლიკების ხელმძღვანელობას და მივხვდით, რომ დახმარების პირველი ეტაპი, როდესაც შეგვიძლია უბრალოდ ფულის გაცემა, ინფრასტრუქტურის განვითარება, უკვე დასრულებულია. ყველაფერი, რისი მიღებაც შეგვეძლო ამ ეტაპიდან ეკონომიკური ზრდის კუთხით, მივიღეთ. ამ დროის განმავლობაში რესპუბლიკების ბიუჯეტების საკუთარი შემოსავლების წილი გაიზარდა: აფხაზეთში - 41,5-დან 52%-მდე, სამხრეთ ოსეთში - 7-დან 18%-მდე. აბსოლუტური მაჩვენებლებით აფხაზეთის მშპ დღეს 32 მილიარდი რუბლია, ხოლო სამხრეთ ოსეთი - 6,1 მილიარდი რუბლი".'

ვოლვაჩი ამბობს, რომ პირველ რიგში მხარდაჭერა სჭირდება ეკონომიკის ისეთ სფეროებს, როგორიცაა სოფლის მეურნეობა, მრეწველობა, ტურიზმი. ეს ზომები, როგორც ის განმარტავს, ისეთივე უნდა იყოს, როგორც რუსეთში გამოყენებული ღონისძიებები, ანუ სუბსიდიები. სესხებზე საპროცენტო განაკვეთის სუბსიდირება შერჩეული პროექტებისთვის.

ამ შემთხვევაში, რუსეთი უფრო კონსულტანტის ფუნქციას შეასრულებს და "დაეხმარება კოლეგებს შესაბამისი კანონების მომზადებაში".

რუსეთის ეკონომიკური განვითარების მინისტრის მოადგილე, დმიტრი ვოლვაჩი 9 მარტს სოხუმში აფხაზეთის დე ფაქტო რესპუბლიკის პრეზიდენტს შეხვდა. ბჟანიას პრესსამსახურის ინფორმაციით, შეხვედრაზე ვოლვაჩმა რეგიონთან რუსეთის სოციალურ-ეკონომიკური თანამშრომლობის გაგრძელების პირობა დადო.

რუსეთის ფედერაციამ და ოკუპირებულმა აფხაზეთმა ერთიანი სოციალურ-ეკონომიკური სივრცის ფორმირების შესახებ პროგრამა 2020 წელს დაამტკიცეს. პროგრამა "აფხაზეთის კანონმდებლობის რუსეთის ფედერაციის კანონმდებლობასთან ჰარმონიზაციას ითვალისწინებს".

2014 წელს სოხუმმა და მოსკოვმა "მოკავშირეობისა და სტრატეგიული პარტნიორობის" შესახებ ხელშეკრულებას მოაწერეს ხელი.

მოსკოვმა საქართველოს რეგიონების - აფხაზეთისა და სამხრეთ ოსეთის "დამოუკიდებლობა" 2008 წლის რუსეთ-საქართველოს ომის შემდეგ ცნო. გარდა რუსეთისა, აფხაზეთის და ცხინვალის რეგიონის ე.წ. დამოუკიდებლობა აღიარებული აქვთ ვენესუელას, ნიკარაგუას, სირიას და ნაურუს.