ახალი ამბები
ზუგდიდის საკრებულოში ბოტანიკურ ბაღში უფასოდ შესვლის საკითხზე იმსჯელებენ
ფრაქცია "ერთიანმა ნაციონალურმა მოძრაობამ" ზუგდიდის საკრებულოს ეკონომიკის, ურბანული განვითარებისა და ქონების მართვის საკითხთა კომისიაში განსახილველად ბოტანიკურ ბაღში შესვლაზე საფასურის გაუქმების განკარგულების პროექტი დაარეგისტრირა. ამის შესახებ ინფორმაცია ფრაქციის თავმჯდომარემ მაია კალანდიამ საკუთარ ფეისბუქზე დაწერა. ის განმარტავს, რომ აღნიშნული ინიციატივით მოსახლეობის უმრავლესობის მოთხოვნას ასრულებენ, რადგან, როგორც კალანდია ამბობს, ადგილობრივებს სურთ, რომ ქალაქის მასშტაბით არსებული ერთადერთი მწვანე სივრცით სარგებლობა თავისუფალი იყოს. რადიო "ათინათს" მაია კალანდიამ უთხრა, რომ კომისიის სხდომა უახლოეს დღეებში ჩაინიშნება. 

"დარგობრივი კომისიის შეკრებას აპარატთან, საკრებულოს თავმჯდომარესთან, ასევე, უშუალოდ დარგობრივი კომისიის წევრებთან შეთანხმებით წყვეტს საკრებულოს ადმინისტრაცია. როდის არ ვიცით, მაგრამ უახლოეს პერიოდში, შეიძლება ეს იყოს ხვალაც, ან პარასკევამდე და პარასკევს ჩაინიშნოს უკვე საკრებულოს სხდომა. დარგობრივ კომისიაზე განხილვის შესახებ შეგატყობინებთ და საკრებულოს გვერდზეც დაიდება, რომ ამომრჩევლები, მოსახლეობა, ნებისმიერი მოქალაქე მოვიდეს, დაესწროს, ვინ რას იტყვის და რას გამოთქვამს ჩვენთვის მნიშვნელოვანია. ვფიქრობ, უმრავლესობა დარგობრივ კომისიაში ის ადამიანები არიან, რომლებიც მხარს დაუჭერენ ამას. ბიუროშიც, სადაც უნდა განიხილონ საკითხი, უმრავლესობით ვართ, ასევე, საკრებულოს სხდომაზეც. სამართლებრივად ყველაფერი დალაგებული გვაქვს, განკარგულების პროექტი დაწერილია გამართულად და ვფიქრობ, ბოტანიკური ბაღი რომ გახდეს უფასო, ამის მიღწევამდე რამდენიმე ნაბიჯი გვაკლია. ამასთან ვფიქრობ, რომ მოქალაქეების აქტიურობა აუცილებელია და ერთად უნდა დავარწმუნოთ ხელისუფლება,  რატომ უნდა მოხდეს ეს. არ გამოვრიცხავ, რომ შემოგვიერთდებიან "ქართული ოცნების" დეპუტატებიც", - ამბობს კალანდია. 

კომისიის კიდევ ერთი წევრი და საკრებულოს თავმჯდომარე გიგა ფარულავა მიიჩნევს, რომ აღნიშნულ საკითხთან დაკავშირებით მსჯელობაში მოქალაქეებისა და საინიციატივო ჯგუფების ჩართულობა აუცილებელია. ამასთან, ის გვეუბნება, რომ პარტია "საქართველოსთვის" ასევე მუშაობს ბოტანიკურთან დაკავშირებულ კონკრეტულ გეგმაზე. 

"უშუალოდ ინიციატივას ჯერ არ გავცნობივარ, რაც დარეგისტრირდა. წინასწარ კომენტარის გაკეთებისგან, უნდა იყოს თუ არ უნდა იყოს (ფასიანი. ავტ) თავს შევიკავებ.  გვექნება კომისიური განხილვა, რომელზეც ჩართული იქნებიან როგორც მხარეები, მერიაც, ასევე, თქვენ იცით, რომ პეტიცია დარეგისტრირდა მოთხოვნით, რომ უფასო იყოს, იქნებიან ამ პეტიციის ავტორებიც. ვფიქრობ, რომ კონსტრუქციული და აქტიური მსჯელობა გვექნება ამ საკითხზე, საზოგადოებისთვის მნიშვნელოვანია ეს საკითხი. არის აზრთა სხვადასხვაობაც, ნაწილი ამბობს, რომ უნდა იყოს ფასიანი, ნაწილი კი არა, დღეს შევიკავებ კონკრეტული პასუხისგან თავს, თუმცა დარგობრივი კომისიის სხდომაზე, ბიუროზეც და შემდეგ საკრებულოს სხდომაზეც ვიმსჯელებთ ამაზე", - თქვა ფარულავამ. 

კითხვაზე, დაუჭერს თუ არა მხარს ოპოზიციური პარტიის ინიციატივას, პირდაპირი პასუხისგან თავს იკავებს ეკონომიკის, ურბანული განვითარებისა და ქონების მართვის საკითხთა კომისიის წევრი და საკრებულოში მმართველი პარტიის წარმომადგენელი თამუნა ჯიქია. 

"ჯერ ვნახოთ, რა ფორმით შემოიტანენ, მერე განვიხილავთ და შესაბამისად, გავცემთ პასუხს. წინასწარ ვერ გეტყვით, რა აქვთ შემოტანილი არ ვიცი, ჯერ არ მომსვლია ეს საკითხი. უნდა ვნახო, რას აპირებენ, მე არ ვარ არაგუნდური მოთამაშე, გუნდურად ვთამაშობ ყოველთვის", - ამბობს ის.

ბოტანიკურის ადმინისტრაციის გადაწყვეტილებით ბაღში შესვლა 1-ლი თებერვლიდან ფასიანი გახდა. დაწესდა სააბონემენტო სისტემა და შეღავათებით მხოლოდ გარკვეული კატეგორიის პირები სარგებლობენ. ბაღში შესვლაზე ფასის დაწესება რამდენჯერმე გააპროტესტეს ახალგაზრდების საინიციატივო ჯგუფმა და მოძრაობა "ხმის" აქტივისტებმა. მათ საკრებულოს შესაბამისი პეტიციითაც მიმართეს, თუმცა მოგვიანებით ზუგდიდის მერიამ მათი მოთხოვნა არ დააკმაყოფილა.

ზუგდიდის მუნიციპალიტეტის 2022 წლის ბიუჯეტში ა(ა)იპ "ბოტანიკური ბაღების მართვის ცენტრისთვის" 850 ათასი ლარია გათვალისწინებული. თანხა თითქმის სრულად იხარჯება ბაღის ადმინისტრაციისა და თანამშრომლების ხელფასზე. "ათინათის" მიერ გამოთხოვილ საჯარო ინფორმაციაში, აღნიშნულია, რომ ააიპ-ში დამტკიცებული საშტატო განრიგი 72 თანამშრომელს ითვალისწინებს, ხოლო ამ ეტაპზე დასაქმებულია 61 პირი. მათი ხელფასები 550-დან 2250 ლარამდე მერყეობს.

ზუგდიდის ბოტანიკურ ბაღში სარეაბილიტაციო სამუშაოები 2018 წლის იანვრის ბოლოს დაიწყო. მისი სრული რეაბილიტაციისთვის 11 974 436 ლარი დაიხარჯა. სამუშაოები სამშენებლო კომპანია "ჯავამ" განახორციელა, რომელმაც მუნიციპალური განვითარების ფონდის მიერ გამოცხადებულ ტენდერში გაიმარჯვა. რეაბილიტაციისთვის საჭირო თანხის 70%-ის გადახდა ზუგდიდს საკუთარი სახსრებით მოუწევს. ამ თანხის 50% მერიამ 11%-იანი სესხის სახით, მსოფლიო ბანკიდან აიღო, ხოლო დანარჩენი 2019 წლის ბიუჯეტიდან გამოყო. რაც შეეხება რეაბილიტაციისთვის საჭირო დანარჩენ 30%-ს, მუნიციპალიტეტმა გრანტის სახით მუნიციპალური განვითარების ფონდიდან მიიღო.

მერიამ სესხის სახით აღებული ფინანსური ვალდებულების გადახდა 2020 წლის იანვრიდან დაიწყო და ის 2028 წლის მარტის თვეში დასრულდება.


ამავე თემაზე: 

ზუგდიდის ბოტანიკურ ბაღში შესვლასა და მომსახურებაში მოქალაქეებმა 6 706 ლარი გადაიხადეს - ადმინისტრაცია

ზუგდიდში ხელმოწერების შეგროვება დაიწყო პეტიციაზე, ბოტანიკურში უფასო შესვლის მოთხოვნით

„ხელოვნება ბოტანიკური ბაღისთვის" - პროტესტი ზუგდიდში

რატომ დაწესდა ზუგდიდის ბოტანიკურში შესვლაზე ფასი და რას ითხოვენ მოქალაქეები

ზუგდიდის ბოტანიკურ ბაღში, სადაც შესვლა უფასოა, 6 მოლარე მუშაობს - აუდიტი
Print Email
FaceBook Twitter
რ ე კ ლ ა მ ა
„სტრესთან ბრძოლის რესურსული მდგომარეობის ძიება“ ეს არის პირველი, პრეცედენტული ტრენინგის თემა ქუთაისში, რომელიც უკრაინელმა ფსიქოლოგებმა - მარინა სტეპანენკომ და ანა შალიმოვამ ჩაატარეს, ქალთა ფონდი „სოხუმის“ ორგანიზებით.
ქალთა ფონდმა „სოხუმმა“დასავლეთ საქართველოს 6 მუნიციპალიტეტში (ქუთაისი, წყალტუბო, ხონი, ზუგდიდი, სენაკი, წალენჯიხა) ქალებისა და ახალგაზრდების საჭიროებების შეფასების შესახებ ახალ კვლევაზე დაიწყო მუშაობა.
ოჯახში და ქალთა მიმართ ძალადობაზე ეფექტიანი რეაგირების, ინფორმაციის გაცვლისა და კოორდინაციისათვის პრიორიტეტული მნიშველობისაა ადგილობრივ დონეზე უწყებათაშორისი კომისიების ფუნქციონირება.
საზოგადოება
საქართველოს პატრიარქის 2023 წლის საშობაო ეპისტოლე გამოქვეყნდა, რომელსაც სრულად გთავაზობთ:
ზუგდიდში თანამედროვე ხელოვნების ფესტივალი "f 5" განახლდა. ფესტივალის პირველი სტუმარი მოდერატორთან ერთად მწერალი ნენე კვინიკაძეა.
ზუგდიდის მუნიციპალიტეტის მერიის სოციალური დაცვის და გენდერული თანასწორობის განყოფილების უფროსი გოგი რევია, პარლამენტის გენდერული თანასწორობის საბჭოს კონკურსის
დღის სიახლეები
01 / თებერვალი 2023
ჟენევის საერთაშორისო დისკუსიების მომდევნო რაუნდის გადადების შესახებ ინფორმაცია ევროკავშირის სპეციალურმა წარმომადგენელმა სამხრეთ კავკასიაში ტოივო კლაარმა დაადასტურა. ჟენევის საერთაშორისო დისკუსიების
01 / თებერვალი 2023
წალენჯიხის მუნიციპალიტეტის მერის გია ხარჩილავას განცხადებით, ის „ერთიანი ნაციონალური მოძრაობის“ ახალ თავმჯდომარესა და ხელმძღვანელობასთან თანამშრომლობას აპირებს.
01 / თებერვალი 2023
გიორგი გაბელიასა და კიდევ 3 პირს, რომელიც ერთიანი ნაციონალური მოძრაობის წალენჯიხის ორგანიზაციის ფეისბუქ-გვერდს მართავდა, გვერდთან წვდომა შეეზღუდათ.
დილის ჩართვა
მთავარი საინფორმაციო გამოშვება
ჩვენი თვითმმართველობა
არქივი
«« თებერვალი 2023 »»
3031 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 12345
ამინდი
ზუგდიდი 6 °C
img
სოხუმი 5 °C
img
ფოთი 10 °C
img
მესტია -2 °C
img
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.