"ზუგდიდდასუფთავების ცენტრის" დაქვემდებარებაში არსებული მანქანების უმრავლესობას სავალდებულო ტექნიკური ინსპექტირება გავლილი არ აქვთ, - ამის შესახებ ზუგდიდის საკრებულოში შექმნილი სპეციალური სამუშაო ჯგუფის შუალედურ ანგარიშში ვკითხულობთ. აღნიშნული ჯგუფი რამდენიმე თვის წინ, ენმ-ის ფრაქციის მიერ შეიქმნა და მიზნად მერიის სამსახურებისა და მუნიციპალიტეტის მიერ დაფუძნებული ააიპ-ებისა და შპს-ის საქმიანობების შესწავლას ისახავს. გუშინ გამართულ რიგგარეშე სხდომაზე ოპოზიციური პარტიების წარმომადგენლებს მერიის 2 ააიპ-ისა და 1 შპს-ს მუშაობაში გამოვლენილი ხარვეზების შესახებ მიაწოდეს ინფორმაცია, მათ შორის მოხვდა "ზუგდიდდასუფთავების" მანქანების თემაც. 

"დროებითმა სამუშაო ჯგუფმა შეამოწმა ააიპ "ზუგდიდდასუფთავების ცენტრის" მიერ მოწოდებული სატრანსპორტო საშუალებების ნუსხა, ტრანსპორტის ტექდათვალიერების  ოფიციალური  ვებგვერდის (www.pti.ge). მონაცემებით,  25 სატრანსპორტო საშუალებიდან ტექდათვალიერება გავლილი აქვს მხოლოდ 5 ავტომობილს, 4 ავტომობილი ქსელში არ იძებნება და 16 ავტოსატრანსპორტო საშუალება მოძრაობს ტექდათვალიერების გარეშე", - აღნიშნა შუალედური ანგარიშის წარდგენისას ენმ-ის წევრმა და ფრაქციის თავმჯდომარემ მაია კალანდიამ.

გარკვეული რაოდენობის ნაგავმზიდებსა და სპეციალურ მანქანებს რომ ტექდათვალიერება გავლილი არ აქვს არ უარყოფს ააიპ-ის ხელმძღვანელი ნუგზარ მალაშხიაც, თუმცა ამასთან განმარტავს, რომ უკვე შეიძინეს საჭირო ნაწილების უმრავლესობა და მანქანები შესაბამისი სარემონტო სამუშაოების შემდეგ გაივლიან შემოწმებას. 

"მიღებული გვაქვს შენიშვნები და გვაქვს 1 თვიანი ვადა, რომ აღმოვფხრათ მიზეზები, რის გამოც ვერ გაიარეს მანქანებმა ტექდათვალიერება. ახალი მანქანებიდან 1-ს აქვს ოდნავ გაბზარული საქარე მინა, გამოწერილი გვაქვს და მალევე შევაკეთებთ. მუხრუჭების პრობლემა იყო რამდენიმეზე. ახლა 1 მანქანა თბილისშია წაყვანილი, 1 სენაკში, 1 ფოთში რემონტზე. 5-6 მანქანა არის ნამდვილად პრობლემური, თუმცა, ვეტევით ვადებში. საქართველოში ერთ-ერთი საუკეთესო ორგანიზაცია გვაქვს, შედეგი გვაქვს ყოველთვის, ჩემი თანამშრომლები ყველაფერს აკეთებენ, რომ ქალაქი იყოს მოვლილი და ობიექტურად თუ უნდა ვინმეს შეაფასოს ჩვენი საქმიანობა - მობრძანდეს და ნახოს ყველაფერი", - გვითხრა ააიპ-ის ხელმძღვანელმა. 

ნუგზარ მალაშხიას ინფორმაციით ტექნიკური ინსპექტირება გავლილი აქვს იჯარით აღებულ ღია ნაგავმზიდებს (გაზ-53), თუმცა სპეციალურ საიტზე მანქანების ნომრების შემოწმებისას, 10-დან მხოლოდ 4 აქვს დადებითი სტატუსი, 2 მანქანა ქსელში არ იძებნება, ხოლო 4-ს ტექდათვალიერება არ გაუვლია.

ამავე საიტის მონაცემებით, ამ ეტაპისთვის "ზუგდიდდასუფთავების" ბალანსზე აღრიცხული მანქანებიდან მხოლოდ 1-ს აქვს გავლილი სავალდებულო შემოწმება, რამდენიმე მანქანას კი პირველად ინსპექტირებაზე დახარვეზების შემდეგ 1 თვიანი ვადა რამდენიმე დღეში ეწურება, 2 მანქანის მონაცემები არ იძებნება, ხოლო დანარჩენებს ტექშემოწმება გავლილი არ აქვთ. ამასთან, ააიპ-ის ინფორმაციით, 3 ავტოსატრანსპორტო საშუალება ჩამოწერას ექვემდებარება.