"ქართული ოცნებიდან" ზუგდიდის საკრებულოს 2 მოქმედი წევრი ანტიამერიკული განცხადებებით გამორჩეულ მოძრაობა "ხალხის ძალას" შეუერთდა. ამის შესახებ ინფორმაციას ირუზა კაკავა და ბეჟან შანავა თავადვე ადასტურებენ. ორივე მათგანი ამბობს, რომ ეს უკავშირდება მათ სურვილს "ხალხს სწორი ინფორმაცია მიაწოდონ". ამასთან დეპუტატები განმარტავენ, რომ ემიჯნებიან "ქართულ ოცნებას", თუმცა რჩებიან ქვეყნის ევროპული კურსის ერთგული.

"გვსურს ის, რაზეც ვსაუბრობდით მანამდე, ვილაპარაკოთ ხალხთან და ცნობიერების დონე ავამაღლოთ. ახლა ვერ დაგიკონკრეტებთ, მაგრამ რაზეც ხდება ახლა საუბარი. მაგალითად შემიძლია ხაზი გავუსვა მეორე ფრონტის გახსნას, ვეწინააღმდეგები ამას, რადგან დევნილი ვარ და გამოვიარე რთული პერიოდი. არ მინდა ეს განმეორდეს, არ მინდა გაგრძელდეს ის, რაც ხდება უკრაინაში", - გვითხრა ირუზა კაკავამ.

კითხვაზე თუ რატომ ხედავს ამის საფრთხეს დეპუტატს ჩამოყალიბებული პასუხი არ აქვს, თუმცა მიიჩნევს, რომ "მეორე ფრონტის" გახსნის საკითხი "დაურეგულირებელია". ამასთან ირუზა კაკავა ამბობს, რომ "ხალხის ძალა" პროევროპული მოძრაობაა და არ წარმოადგენს ანტიამერიკულ ძალას.

მოძრაობის კიდევ ერთი ახალი წევრი ბეჟან შანავა კონკრეტული მოტივების შესახებ საუბარს თავს არიდებს და ამბობს, რომ საკრებულოში რჩება, თუმცა, სავარაუდოდ, დატოვებს მმართველი პარტიის ფრაქციას.

"საზოგადოებამ უნდა იცოდეს სიმართლე, თუ რა პროცესები მიმდინარეობს მსოფლიო პოლიტიკაში და რა სიტუაციაში არის დღეს საქართველო. კონკრეტიკა ცოტა მოგვიანებით... საკრებულოს წევრად დავრჩები და ფრაქციიდან მგონი გავალ, ალბათ დავტოვებ. ვემიჯნებით ჩვენ "ქართულ ოცნებას", თუმცა ვრჩებით იმ კურსზე რომელიც საზოგადოებას აქვს გადაწყვეტილი ევროინტეგრაციის კუთხით, უბრალოდ რაღაც საკითხებში, რაც ხალხმა უნდა იცოდეს ამ ინფორმაციას ფართო მასებში გავავრცელებთ. მხოლოდ ქართველი ხალხის გამარჯვებისკენ გვაქვს ორიენტაცია აღებული", - ამბობს დეპუტატი.

"ხალხის ძალამ" გუშინ გაავრცელა ინფორმაცია იმის შესახებ, რომ მოძრაობას 200-მდე ახალი წევრი შეემატა, რომლებიც მუნიციპალიტეტების საკრებულოს წევრები და თანამდებობის პირები არიან. მათ შორისაა ხობის ყოფილი მერი გოჩა ქაჯაიაც, რომელიც დღეს ხობის საკრებულოს თავმჯდომარის მოადგილის თანამდებობას იკავებს.