ზუგდიდის სკეიტპარკში აქცია მიმდინარეობს, რომელზეც არასამთავრობო ორგანიზაციების, პოლიტიკური პარტიების წარმომადგენლები და რიგითი მოქალაქეები რუსეთთან ავიამიმოსვლის აღდგენის აპროტესტებენ. მათ ხელში უჭირავთ ტრანსპარანტები წარწერით: "რუსული თვითმრინავი ევროკავშირში არ ჯდება", "არა რუსულ ფრენებს", "საქართველო არასდროს გახდება რუსეთის გუბერნია", "მონობა სტუმარ- მასპინძლობა არაა".
აქციის მონაწილემ, სამართლიანი არჩევნების (ISFED) რეგიონულმა კოორდინატორმა დავით ლოგუამ რადიო "ათინათს" უთხრა, რომ ისინი ეხმურებიან თბილისში მიმდინარე მოვლენებს და კერძოდ, საბოტაჟს, რომელსაც "ახორციელებს ვერტიკალი ევროინტეგრაციის გზაზე".

"მოგეხსენებათ, მთელი მსოფლიო შეკრულია ერთი აზრის გარშემო, რომ რუსეთი არის ტერორისტი ქვეყანა და ახორციელებს ამ საშინელ ტერორისტულ აქტებს, ჩვენი მოძმე უკრაინელი ერის წინააღმდეგ და ამ დროს საქართველოს ხელისუფლება ყველაფერს აკეთებს იმისათვის, რომ ის კოლაბორანტული პოლიტიკა, რასაც წლების განმავლობაში ჩვენ ვეწინააღმდეგებოდით, და როგორც იქნა, გავხადეთ საკუთარი ქვეყანა დამოუკიდებელი, მაგრამ, დღეს ვუბრუნდებით იმ წარსულს, რასაც ჰქვია, თბილისის გუბერნია და ქუთაისის გუბერნია. ვფიქრობთ, რომ დღეს როცა ვსაუბრობთ, რომ საქართველო 20% ოკუპირებულია, რუსეთი ყველაფერს აკეთებს, რომ ის მთლიანად 100% - ით გახდეს ოკუპირებული, სწორედ, ამ ფაქტს ვეწინააღმდეგებით".

"საერთაშორისო გამჭვირვალობა-საქართველოს" ზუგდიდის რეგიონული წარმომადგენლობის ხელმძღვანელის არჩილ თოდუას განცხადებით, რუსეთში ფრენების დაწყება - არდაწყების საკითხს დღეს არა პუტინი, არამედ საქართველო წყვეტს და პასუხისმგებლობაც სრულად საქართველოს მთავრობას ეკისრება.

"თუ საქართველო არ მისცემს თანხმობას, თვითმფრინავი ვერ ჩამოფრინდება. ფრენების განახლება კი საფრთხეს უქმნის საქართველოს ევროინტეგრაციის პროცესსს. რუსული თვითმფრინავი არ ჯდება ევროკავშირში და არც უნდა ჯდებოდეს საქართველოში", - გვითხრა მან.

აქცია,"სამოქალაქო სოლიდარობის ფონდის" ორგანიზებით იმართება. 
შეგახსენებთ, გუშინ თბილისის საერთაშორისო აეროპორტში რუსული ავიაკომპანია "აზიმუტის" თვითმფრინავი დაეშვა. რუსეთ - საქართველოს შორის უვიზო მიმოსვლის აღდგენის შემდეგ ეს პირველი შესრულებული რეისია.

პარალელურად თბილისის საერთაშორისო აეროპორტის მიმდებარედ საპროტესტო აქცია მიმდინარეობდა.

ოკუპანტი ქვეყნის ხელისუფლებამ საქართველოსთვის დაწესებული სავიზო რეჟიმის გაუქმებისა და ფრენების აღდგენის გადაწყვეტილება 10 მაისს გამოაცხადა.