ახალი ამბები
სოციალურ ქსელებში აფხაზები საქართველოს ეროვნული ნაკრების გამარჯვებას განიხილავენ
საქართველოს ეროვნული ნაკრების გამარჯვებას და მათ მიერ ევროპის ჩემპიონატზე თამაშის უფლების მოპოვებას სოციალური ქსელების აფხაზურ სეგმენტში განიხილავენ.

აფხაზმა ჟურნალისტმა და ბლოგერმა როინ აგრბამ ფეისბუკპოსტი გამოაქვეყნა, რომელიც საქართველო - საბერძნეთის მატჩის შედეგებს ეხებოდა:

“თერთმეტმეტრიანების სერიაში 4:2 საქართველომ საბერძნეთი დაამარცხა და ევროპის საფეხბურთო ჩემპიონატის ფინალში პირველად გავიდა”.

მის ამ პოსტს კომენტარებში ცხარე დისკუსია მოჰყვა,  სოციალური ქსელის აფხაზი მომხმარებლების ნაწილმა დაწერა:

„მათთვის ეს მართლაც ისტორიული წარმატებაა“.

„მათ კარგი შემადგენლობა ჰყავთ. ჩაკვეტაძე კვარაცხელიაზე ნაკლებად როდი თამაშობს“.

ნაწილი კი გამოეხმაურა იმ ფაქტს, რომ გამარჯვების შემდეგ ფეხბურთელები თბილისში, რესპუბლიკის მოედანზე სკანდირებდნენ: „აფხაზეთი საქართველოა, სამაჩაბლო საქართველოა“.

„თავიდან ვიფიქრე, რა ყოჩაღები არიან, ევროპის ჩემპიონატზე გავიდნენ-მეთქი (მეზობლურად მინდოდა მომელოცა), მაგრამ ფეხბურთელებმა აფხაზეთსა და ოსეთზე რომ დაიწყეს სკანდირება, ეს სურვილი გამიქრა (ფეხბურთელებს ეს არ უხდებათ, მიტინგზე ხომ არ არიან!)“.

„და ჩვენ რა გვესაქმება ამ ყველაფერთან? მით უფრო, რომ მთელი გუნდი თამაშის მერე ყვიროდა: „აფხაზეთი საქართველოა, სამაჩაბლო საქართველოა, და სტადიონიც ისტერიკულად იმეორებდა მათ სიტყვებს. სანამ მათ ტვინებსა და პოლიტიკაში ეს ფრაზებია, მათი წარმატება არ მაინტერესებს, არც სპორტში და არც სხვა სფეროებში“.

„ვნახე ვიდეო (მთელი „ტიკ-ტოკი“ წალეკეს), სადაც გულშემატკივრები და ფეხბურთელები თავიანთ საყვარელ ლოზუნგებს გაჰყვირიან. ვუსურვებ, რაც შეიძლება მალე გამოვარდნენ. სპორტი და ხელოვნება პოლიტიკას არ უნდა ეხებოდეს“.
„ქართველი ფეხბურთელების დღევანდელმა თაობამ ისტორია დაწერა. პირადად მე იგივე ემოციები მაქვს, რაც 1981 წლის 13 მაისს. მას შემდეგ, რაც ოჩამჩირელმა ბიჭმა ვიტალი დარასელიამ დაუვიწყარი გამარჯვების გოლი გაიტანა“.
„საქართველომ ლუქსემბურგსაც აჯობა. მაგარია. ისეთ დონეზე თამაშობენ“ .

„მოკლედ გიპასუხებ. ვინც ფეხბურთში ერკვევა, მიხვდება რასაც ვგულისხმობ. ამ შოვინისტური ვიდეოს ნახვის შემდეგ ჯგუფში საფრანგეთს, ჰოლანდიას და ინგლისს გისურვებთ“.


ტელეგრამ - არხი „რესპუბლიკა“ წერს, რომ: „ხელისუფლებებს, რომლებიც სპორტული ღონისძიებების წესებსა და ჩარჩოებს განსაზღვრავენ, რეაქცია უნდა ჰქონდეთ საქართველოს ნაკრების ფეხბურთელების არაადეკვატურ საქციელზე“.

სოციალურ ქსელში გამოაქვეყნეს სტატია, სადაც წერია, თუ როგორ დააჯარიმა 2022 წელს ფიფამ სერბეთის საფეხბურთო კავშირი - გასახდელში ეროვნულ ნაკრებს ჰქონდა დროშა, რომელზეც სერბეთი კოსოვოს შემადგენლობაში იყო გამოსახული.

სოციალური ქსელების ქართველი მომხმარებლებიც გამოეხმაურნენ პოსტს:

„მალე ერთად ვიზეიმებთ საქართველოს გაერთიანებას“.

„მადლობა როინ თქვენი სიტყვებისთვის, სპორტი, რა თქმა უნდა, ყოველთვის პოლიტიკაა, ისევე როგორც კულტურაა პოლიტიკა. პოსტის ქვეშ დისკუსიებიც პოლიტიკაა, მაგრამ კარგია, რომ სიხარულმა სოხუმამდეც მოაღწია“.

„დაე, ეს გამარჯვება ლეგენდარული აფხაზი ფეხბურთელის, ქართული ფეხბურთის ისტორიაში ყველაზე მნიშვნელოვანი და გადამწყვეტი გოლის ავტორის, ვიტალი დარასელიას ხსოვნას მიეძღვნას“.


აფხაზი ოპოზიციონერი და გალის ე.წ. ადმინისტრაციის ყოფილი ხელმძღვანელი თემურ ნადარაია:

ჩვენ, აფხაზეთის ნაკრები, შეიძლება კიდევ 100 წელი ვერ მოვხვდეთ ევროპის ჩემპიონატზე, მაგრამ თქვენთან ერთად ერთ სახელმწიფოში ცხოვრებას მაინც არ ვაპირებთ. ვცხოვრობდით უკვე საქართველოს სსრ-ის ფარგლებში, „აფხაზპერესელენცსტროის“ გამოისობით. აფხაზურ ენაზე ლაპარაკის უფლება არ გვქონდა, იყო ომი და გენოციდი. კარგი არაფერი გვინახავს. ახლა, არაღიარების პოლიტიკის, ეკონომიკური და სხვა სანქციების გამო, მათ შორის სპორტში, ევროპის ღონისძიებებში ვერ ვმონაწილეობთ. არა უშავს, ამასაც გავუმკლავდებით, გამოსავალს ვიპოვით. მთავარია, ჩვენთან ფეხბურთი უყვართ. აფხაზეთის ჩემპიონატი არსებობს. არაღიარებულ ქვეყნებს შორის მსოფლიო ჩემპიონატიც არსებობს. ჯერ ასეა, მაგრამ ჩვენს დამოუკიდებლობასა და თავისუფლებას ყველაზე მეტად ვაფასებთ. ეს დაიმახსოვრეთ“.


ჟურნალისტი როინ აგრბა:

„ყოველთვის ასე ხდება. როცა 2016 წელს ჩვენმა ნაკრებმა ConIFA (საფეხბურთო ორგანიზაცია, რომელიც აერთიანებს ფიფას მიერ უარყოფილ საფეხბურთო ასოციაციებს - რ.თ.) მოიგო და ქვეყანას უხაროდა, სამწუხაროდ, ქართველი ფეისბუკმომხმარებლების უმეტესობა ირონიულ კომენტარებს წერდა. დაგვცინოდნენ. პენჯაბთან ფსონებიც კი გააუქმეს, ოფისები დახურეს და ასე შემდეგ. თუმცა, კეთილის მსურველებიც იყვნენ, ისინი, ვინც გულწრფელად გულშემატკივრობდნენ ჩვენს ნაკრებს. და არანაირი პოლიტიკური ლოზუნგები და შეურაცხმყოფელი შეძახილები არ იყო. ამისთვის მოწიწებით თავს ვუხრი ჩვენს მოთამაშეებს და გულშემატკივრებს. სიმართლე გითხრათ, მინდა, მოვისმინო აფხაზი გულშემატკივრების გულწრფელი მილოცვა საქართველოს ნაკრების მიმართ. მოვისმინე კიდეც, სანამ ისეთი პოლიტიკური ლოზუნგები და შეძახილები არ გამოჩნდა, რომლებიც ჩვენი ფეისბუკმომხმარებლების უმეტესობას აღიზიანებს. ფეისბუკის მომხმარებლებო საქართველოდან, როდის ისწავლით, რომ უბრალოდ გაიხაროთ საკუთარი თავით და მეზობლების წარმატებითაც? მხოლოდ სპორტისა და პოზიტიური ემოციისთვის? აუცილებლად ყველაფერი რაღაც პირობითობაში უნდა მოაქციოთ? რაც წინასწარ იცით, რომ ოპონენტებს გააღიზიანებს? მიუხედავად ამისა, ვულოცავ ნამდვილ გულშემატკივრებს ამ გამარჯვებას. ნაკრებმა ეს დაიმსახურა. ასევე ვუსურვებ, მიმოიხედონ და მიიღონ როგორც მოცემულობა, რომ სჯობს კეთილი მეზობლები ვიყოთ, კარგი ნათესავები, ვიდრე კონფრონტაცია შევქმნათ იქ, სადაც ის შეიძლება არ ყოფილიყო“.

დინამო არენაზე საქართველოს ეროვნულმა ნაკრებმა „ევრო 2024-ის“ პლეი ოფის ფინალში, საბერძნეთი ანგარიშით - 4:2 დაამარცხა.
საქართველოს ნაკრები ევროპის ჩემპიონატზე პირველ თამაშს დორტმუნდში, თურქეთის ნაკრების წინააღმდეგ, 18 ივნისს ჩაატარებს.


Print Email
FaceBook Twitter
დაფინანსებული
საქართველოს ეროვნული ნაკრები ისტორიაში პირველად ევროპის ჩემპიონატზე მონაწილეობს.
14 ივნისს საქართველოში შეზღუდული შესაძლებლობების მქონე პირთა უფლებების დაცვის დღე აღინიშნება.
6 ივნისს, ზუგდიდში, კოსტავას N36-ში “ჯი პი აი ჰოლდინგის” ახალი ოფისი გაიხსნა.
დღის სიახლეები
21 / ივნისი 2024
ძლიერი წვიმის შედეგად  წალენჯიხის რამდენიმე უბანში დაიტბორა საკარმიდამო მიწის ნაკვეთები და ჩამოირეცხა შიდა საუბნო გზები.
21 / ივნისი 2024
ხელოვნებისა და ტურიზმის განვითარების ცენტრ "ოდიშის" ორგანიზებით ზუგდიდში ფესტივალი "არტ-კოლხი" ჩატარდება.
21 / ივნისი 2024
ზუგდიდში, მუნიციპალიტეტის სკოლამდელ სააღმზრდელო დაწესებულებათა მართვის ცენტრს დაქვემდებარებულ ბაღებში აღსაზრდელების რეგისტრაცია 1 აგვისტოდან დაიწყება და 15 სექტემბერს დასრულდება. ამის შესახებ ინფორმაცია
დილის ჩართვა
ოდაბადეშ კინოხონი
დადიანების სასახლეთა საგანძური
მთავარი საინფორმაციო გამოშვება
არქივი
ამინდი
ზუგდიდი 20 °C
img
სოხუმი 20 °C
img
ფოთი 22 °C
img
მესტია 10 °C
img
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.