48 საათიანი პატიმრობის შემდეგ, ზუგდიდელი აქტივისტი, როსტომ ზარანდია თავისუფალია. მან გვითხრა, რომ კანონსაწინააღმდეგო არაფერი ჩაუდენია. ზარანდია წინასწარი დაკავების იზოლატორში იმყოფებოდა და მას შემდეგ, რაც ოცდაოთხსაათიანი ვადა ორჯერ ამოიწურა, გამოუშვეს. მისივე თქმით, დაკავების მომენტში, მას პოლიციელებმა სიტყვიერი და ფიზიკური შეურაცხყოფა მიაყენეს.

„დაკავება არ იყო, ეს იყო გატაცება. თერთმეტის ნახევარზე გამიტაცეს ცემა - ცემით და მანქანაში ცალკე ცემა - ფურთხებით, მაგრამ დილის ხუთ საათზე დაწერეს (ოქმი - რედ.), გადაიწერა ერთმა "მილიციელმა" მეორისგან, რომ „იგინებოდა - ილანძღებოდა“, როგორც სტანდარტული წესი, მეტი სხვა არაფერი მიწერია, რომელიც გააფორმეს დილის 5 საათზე. 163 -ე წერია და გადაკეთებულია 166-ე და 173-ე მუხლებად. ვინც თავიდან ადგენდა ოქმს ის გადაშლილია და სხვა არის მიწერილი. კარგად ნაცემი ვარ, ტუჩი მაქვს გახეთქილი და წვერი მაქვს დაპუტული ნახევარზე. უხაროდათ, წვერს რომ მაპუტავდნენ. წვერით დამაკავეს, მოხერხებული აღმოჩნდა მათთვის ეს“, - ამბობს ზარანდია.

ზუგდიდელი სამოქალაქო აქტივისტი პოლიციამ თბილისში 30 აპრილი - 1 მაისის აქციის ღამეს დააკავა, რომელზეც მოქალაქეები „აგენტების“ კანონს აპროტესტებდნენ.

საქართველოს პარლამენტმა, 83 ხმით, "უცხოური გავლენის გამჭვირვალობის შესახებ" კანონპროექტი მეორე მოსმენით 1 მაისს მიიღო. წინააღმდეგ წავიდა 23 დეპუტატი. კანონპროექტის განხილვა მრავალათასიანი აქციების ფონზე მიმდინარეობს.

"აგენტების" საწინააღმდეგო აქცია, 2 მაისს თბილისსა და საქართველოს სხვა ქალაქებში მიმდინარე მანიფესტაციების ფონზე, ზუგდიდში ისევ გაიმართა.