ზუგდიდში, სკეიტ პარკის ტერიტორიზე, ევროპის დღეების ფარგლებში, „აგენტების“ კანონის მოწინააღმდეგეებმა შეკრება, დაახლოებით, 6 საათზე დაიწყეს.

ისინი „ქართული ოცნების“ მიერ ხელახლა ინიციირებულ კანონს კვლავ აპროტესტებენ და საუბრობენ იმ საფრთხეებზე, რომლებსაც ეს კანონი ქვეყნის ევროპულ მომავალს უქმნის. 



აქვე გამოფენილია საინფორმაციო სტენდები, რომლის საშუალებითაც აქციაზე მოსულებს შეუძლიათ გაეცნონ და წაიკითხონ სამეგრელოში მოქმედი არასამთავრობო ორგანიზაციების საქმიანობების, გრანტების და ამ გრანტების შედეგად მიღებული სიკეთეების შესახებ.



დღესვე დაგეგმილია სიტყვით გამოსვლები. რაც შეეხება მუსიკალურ ნაწილს, ორგანიზატორები აქციაზე შეკრებილებს სთავაზობენ კლუბურ მუსიკას. 



ინფორმაციისთვის, ე.წ აგენტების კანონთან დაკავშირებით, დემონსტრაციები ქვეყნის მასშტაბით რამდენიმე კვირაა მიმდინარეობს.


"უცხოური გავლენის გამჭვირვალობის შესახებ" კანონპროექტი, საქართველოს პარლამენტმა, 83 ხმით, პირველი მოსმენით 17 აპრილს, ხოლო მეორე მოსმენით, 1 მაისს მიიღო. „აგენტების კანონის“ წინააღმდეგ საპროტესტო აქციები სახელწოდებით: „კი ევროპას! არა რუსულ კანონს“ თბილისსა და საქართველოს სხვა ქალაქებში, მათ შორის ზუგდიდში, მესამე კვირაა, უწყვეტად მიმდინარეობს.