უკრაინაში, რუსეთის მხარეს მებრძოლი, ოკუპირებული აფხაზეთის "სახელმწიფო უსაფრთხოების სამსახურის" ყოფილი თანამშრომელი, დაურ ხმელევი დაიღუპა, წერს „აფსნიპრესი“.

ამავე ცნობით, მობილიზაციამდე, ის მოსკოვში მუშაობდა, „საავიაციო და სატრანსპორტო უსაფრთხოების მართვის ჯგუფის მთავარი სპეციალისტად. საბრძოლო ზონაში მეთაურობდა ასეულს“, ნათქვამია ინფორმაციაში.

მანამდე გავრცელდა ინფორმაცია კიდევ ერთი აფხაზი მოხალისის დაღუპვის შესახებ. გუდაუთის მცხოვრები დიმიტრი ბაზბა რუსეთის საოკუპაციო ძალების მხარეს იბრძოდა, ის დონეცკის რეგიონში დაიღუპა.

დე ფაქტო რესპუბლიკის საგანგებო სიტუაციების მართვის სამინისტრო მიმდინარე წლის იანვარში იტყობინებოდა, რომ რუსეთის უკრაინაში შეჭრიდან დღემდე, რუსეთის მხარეს მებრძოლი თერთმეტი აფხაზი მოხალისის ცხედრის გადმოსვენება მოხერხდა სოხუმში.

ცნობისთვის, 2022 წლის მარტში ოკუპირებული აფხაზეთის "დამოუკიდებლობა" ე.წ. ლუგანსკის სახალხო რესპუბლიკამ აღიარა. მანამდე აფხაზეთის დე ფაქტო რესპუბლიკის საგარეო საქმეთა სამინისტრომ გაავრცელა პრესრელიზი, რომელშიც ნათქვამია, რომ სოხუმმა და ე.წ დონეცკის სახალხო რესპუბლიკამ "დიპლომატიური ურთიერთობები დაამყარეს და ნოტები გაცვალეს".

26 თებერვალს, აფხაზმა ლიდერმა ასლან ბჟანიამ ხელი მოაწერა ბრძანებას დონბასის სეპარატისტული ე.წ.დონეცკისა და ლუგანსკის რესპუბლიკების აღიარების შესახებ.

რუსეთი უკრაინის წინააღმდეგ ომს 2022 წლის 24 თებერვლიდან აწარმოებს. იმავე წლის 21 თებერვალს, რუსეთის პრეზიდენტმა ვლადიმირ პუტინმა ცნო ე. წ. დონეცკისა და ლუგანსკის სახალხო რესპუბლიკების "დამოუკიდებლობა და სუვერენიტეტი".

საქართველოს ორი რეგიონის აფხაზეთისა და "სამხრეთ ოსეთის " დამოუკიდებლობა სირიამ 2018 წელს, მანამდე, 2008 წლის აგვისტოს ომის შემდეგ რუსეთმა, იმავე წლის სექტემბერში კი ნიკარაგუამ აღიარეს. 2009 წელს აფხაზეთის და ცხინვალის რეგიონი ე.წ. დამოუკიდებელ რესპუბლიკებად ვენესუელამ და ნაურუმ ცნეს.