ოკუპირებულ რეგიონებში დევნილების უსაფრთხო დაბრუნების უფლების შესახებ გაეროს რეზოლუციას სოხუმში ეხმაურებიან და აცხადებენ, რომ ის „ცალმხრივია“.

„არაერთხელ, მათ შორის ჟენევის საერთაშორისო დისკუსიების ფარგლებში, ცდილობდნენ მიეღოთ შესაძლებლობა, გაეროს გენერალური ასამბლეის მონაწილეებს წარმოედგინათ საკუთარი პოზიცია ლტოლვილების საკითხთან დაკავშირებით. სამწუხაროდ, აფხაზური მხარის ყველა მოთხოვნა, რომ ყველა დაინტერესებული მხარისთვის თანაბარი პირობები იყოს უზრუნველყოფილი, სრულიად იგნორირებულია“, - აღნიშნულია დე ფაქტო რესპუბლიკის საგარეო საქმეთა სამინისტროს კომენტარში.

ისინი მოუწოდებენ გაეროს გენერალურ მდივანს, „გამოიჩინოს პოლიტიკური ნება და უზრუნველყოს“ აფხაზური მხარის წარმომადგენლების მონაწილეობა გაეროს შესაბამისი კომიტეტების მუშაობაში.

2024 წლის 4 ივნისს, ნიუ-იორკში, გაეროს გენერალურ ასამბლეაზე - "აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ" რეზოლუცია მიიღეს.

იგი საქართველოსა და მსოფლიოს სხვადასხვა რეგიონის 63 ქვეყნის მიერაა ინიციირებული.

წელს რეზოლუციას მხარი 103-მა სახელმწიფომ დაუჭირა, რაც, 3-ით აღემატება გასული წლის მაჩვენებელს. აღსანიშნავია, რომ, ისტორიაში პირველად, მხარდამჭერთა შორის სომხეთიც არის.

რაც შეეხება საქართველოს ერთ-ერთ სტრატეგიულ პარტნიორს - ჩინეთს, რომელთანაც საქართველოს უვიზო მიმოსვლის შესახებ შეთანხმება აქვს გაფორმებული, მან კენჭისყრაში მონაწილეობისგან თავი შეიკავა. მასთან ერთად, კიდევ 51-მა ქვეყანამ პროცესში მონაწილეობა არ მიიღო.