დღეს ზუგდიდში აქცია სახელწოდებით "შეზღუდული შესაძლებლობების მქონე პირები ევროპული მომავლისთვის" ზვიად გამსახურდიას ბიუსტთან გაიმართა.

პროტესტის მონაწილეები ამბობენ, რომ "აგენტების" კანონი უდიდესი გამოწვევების წინაშე აყენებს იმ ორგანიზაციებს, რომლებიც წლების მანძილზე შშმ პირთა უფლებების დაცვისთვის მუშაობენ როგორც ინდივიდუალურ, ასევე, პოლიტიკის შექმნის დონეზე.

"აქციაზე გამოსული არიან შშმ პირები რომლებიც უპირისპირდებიან რუსულ რეჟიმს საქართველოში და ისინი ემხრობიან საქართველოს ევროატლანტიკურ ინტეგრაციას და მათი მთავარი მოთხოვნაა ის, რომ კანონზე საბოლოოდ თქვას პარლამენტმა უარი და არ დაუკარგოს საქართველოს ევროკავშირში გაწევრიანების პერსპექტივა. საზოგადოების პროტესტი გრძელდება დიდი ხანია, მართალია, დღეს მას ფორმა აქვს შეცვლილი, თუმცა ვიბრძვით იმისთვის, რომ საბოლოო გამარჯვება მოიპოვოს ქართველმა ხალხმა", - თქვა აქციის ორგანიზატორმა, "საერთაშორისო გამჭვირვალობა - საქართველოს" რეგიონული ოფისის ხელმძღვანელმა არჩილ თოდუამ.

შშმ პირი და არასამთავრობო ორგანიზაცია "პულსის" წარმომადგენელი ელგუჯა ბეჭვაია რადიო "ათინათთან" ამბობს, რომ მათი საქმიანობა გამჭვირვალეა და გრანტების მიღებისას ყველა დეტალი დასაბუთებულია.

" ვმუშაობ შშმ პირებზე, მათ დასაქმებაზე, საზოგადოებაში ადაპტაციაზე. ამას ყველაფერს ფინანსები სჭირდება. ახალი დაარსებული ორგანიზაცია ვართ ერთადერთი, პირველი გრანტი მივიღეთ. ეს გრანტი მიზნობრივად დავხარჯეთ, თავისთავად.

არამიზნობრივად, არასამთავრობო ორგანიზაცია ფიზიკურად გრანტს ვერ დახარჯავს, იმიტომ, რომ როცა გრანტი მოდის, იმას მოჰყვება უკან, ერთხელ რევიზია, მეორეჯერ რევიზია და ა.შ. და არცერთი ფონდი გრანტს არ გადაურიცხავს, თუ დასაბუთებული არ არის ყველაფერი. ელემენტარული, ავტოკალამს ვერ იყიდი ადამიანი, თუ ეს პროექტში არ არის გაწერილი. ამაზე დიდი გამჭვირვალობა რა უნდა იყოს", - აღნიშნავს ის.

მისი განმარტებით, საკანონმდებლო ორგანომ "აგენტების" კანონი უკან უნდა გაიწვიოს და გრანტების მიღება არ უნდა შეწყდეს, რადგან როგორც ამბობს, ეს აისახება ადამიანების მდგომარეობაზე, განსაკუთრებით კი, შშმ პირთა უფლებებზე. 

ინფორმაციისთვის, საქართველოს პარლამენტმა, 84 ხმით, "უცხოური გავლენის გამჭვირვალობის შესახებ" კანონპროექტი პირველი მოსმენით - 17 აპრილს, მეორე მოსმენით - 1 მაისს, მესამე მოსმენით კი - 14 მაისს მიიღო. პრეზიდენტმა მას ვეტო 18 მაისს დაადო.

საკანონმდებლო ორგანომ პლენარულ სხდომაზე, კვლავ 84 ხმით, "აგენტების" კანონზე პრეზიდენტის ვეტო 28 მაისს დაძლია. ქვეყანაში საპროტესტო აქციები ორ თვეზე მეტია მიმდინარეობს. მოქალაქეების ნაწილი ამბობს, რომ ვერ შეეგუება ქვეყნის დასავლური კურსიდან გადახვევას.


ამავე თემაზე:

რატომ არა ე.წ აგენტების კანონს - ზუგდიდელების პასუხები (ფოტო/ვიდეო)

რუსული კანონით აფხაზეთს ვერ დავიბრუნებთ - აქცია ზუგდიდში (ფოტორეპორტაჟი)

რადიო "ათინათი" სხვა მედიებთან ერთად ე.წ აგენტების კანონის პარლამენტში წარდგენას აპროტესტებს

გადაუხვია თუ არა ხელისუფლებამ ევროკავშირისკენ მიმავალი გზიდან - ადგილობრივების პასუხები (ვიდეო)

ქვარაია, თოლორაია, ბერაია, ხახუბია - "აგენტების კანონის" მხარდამჭერები სამეგრელოდან