ზუგდიდის სოფელ ონარიის საჯარო სკოლის მასწავლებელი მანანა მიქავა „სულაკაურის გამომცემლობის" 2024 წლის რჩეულთა შორის დასახელდა.

გამომცემლობის ფეისბუკ ჯგუფში „სამასწავლებლო“ ვკითხულობთ:

„ის ერთ-ერთი პირველია, ვინც მასწავლებლებისთვის ღირსეულ სამუშაო პირობებს ხმამაღლა და დაუღალავად ითხოვს - ყველგან, სადაც ხმა მიუწვდება თუ არ მიუწვდება; არ ერიდება სიმართლის მკვეთრად დაფიქსირებას. ღამეებს ათევს მოქალაქეების გვერდით უკეთესი მომავლისთვის ბრძოლაში;

მისი მოსწავლეები აქტიურად ერთვებიან სხვადასხვა პროექტში, რომელიც მათ წიგნიერებასა და განვითარებას უწყობს ხელს.  ... წელს მისი სკოლის ბიბლიოთეკა 200 ახალი წიგნით შეივსო და ეს მისი დაუღალავი შრომის დამსახურებაა.

...მისი სახით უამრავ მოსწავლეს ჰყავს, არა მხოლოდ ქართულის კარგი მასწავლებელი, არამედ ადამიანი, რომელიც მათ სწორ და ნათელ პოზიციაზე დგომასაც ასწავლის“.

თავად მანანა მიქავამ რადიო „ათინათს“ უთხრა, რომ საზეიმო ცერემონიაზე, რომელიც 15 ივნისს გამართა „სულაკაურის გამომცემლობამ“, მასთან ერთად 10 მასწავლებელი დაჯილდოვდა, კამპანიის #მადლობამასწავლებელო ფარგლებში, რომელიც უკვე მეოთხე წელია, რაც გამომცემლობის ინიციატივით იმართება და მასწავლებლის პროფესიის დაფასებას და პოპულარიზაციას ემსახურება.

„...მათ შორის მოვხვდი მე, სხვადასხვა ნომინაციები ჰქონდათ და „მოქალაქეობრივი თვითშეგნების მაგალითის ჩვენებისთვის“ დამაჯილდოვეს სიგელით და პრიზებით. ნამდვილად ამაღელვებელი იყო, რომ ვიღაცისთვის შენი ნაბიჯები და შენი ქმედებები ძალიან ღირებული და მნიშვნელოვანია და ეს ორმაგად გიზრდის მოტივაციას, რომ მომავალში უფრო უკომპრომისოდ გააგრძელო მიზნისთვის ბრძოლა, რა მიზანიც დაისახე თავიდან და ყველაფერი გააკეთო იმ სისტემის გაჯანსაღებისთვის, რასაც ემსახურები და გჯერა, რომ უკეთესს იმსახურებენ შენი მოსწავლეები და შენი მომავალი“, - ამბობს ზუგდიდელი მასწავლებელი.

ცოტა ხნის წინ, მანანა მიქავამ სოციალურ ქსელში, მასწავლებლების ერთ-ერთ გვერდზე დაწერა, რომ პედაგოგთა შრომითი ანაზღაურების ახალი პოლიტიკით გაზრდილი ხელფასი, 157 ლარი განათლების მინისტრს გიორგი ამილახვარს უკან გადაურიცხა. ამ ფორმით მან განათლების სამინისტროს მიერ ამოქმედებული ახალი სახელფასო რეფორმა გააპროტესტა.

შეგახსენებთ, საქართველოს მთავრობამ განაცხადა, რომ 1 ივლისიდან, განათლების სისტემის ახალი რეფორმის თანახმად, საჯარო სკოლის ყველა სტატუსიან და სპეციალურ მასწავლებელს ხელფასი, საშუალოდ, 500 ლარით გაეზრდებოდა.