ზუგდიდში თანამედროვე ხელოვნების ფესტივალი F5 მეორე დღეა მიმდინარეობს, რომელშიც მონაწილეობას იღებენ ქართველი პოეტები, პროზაიკოსები, მთარგმნელები, კინომცოდნეები, რეჟისორები და მუსიკოსები.

ფესტივალის კინემატოგრაფიული ნაწილი გაიმართა სოციალურ კაფე "მეგობარში". დღეს ზუგდიდელმა მაყურებელმა ნახა სალომე ჯაშის ფილმი – „მოთვინიერება“

თანამედროვე ხელოვნების ფესტივალს, წინა წლების მსგავსად, ლიტერატურული და მუსიკალური ნაწილი აქვს.

F5 - ის ორგანიზატორის ნიკა ლაშხიას თქმით, მსგავსი ტიპის ფესტივალი რეგიონისთვის განსაკუთრებით მნიშვნელოვანია.

,,ფესტივალს ყოველ წელს სხვადასხვა ავტორები სტუმრობს და მრავალფეროვანია. ძალიან მნიშვნელოვანია ზუგდიდისთვის და მკითხველისთვის მსგავსი ტიპის ფესტივალი, რადგან მათ საყვარელ ავტორებს ხვდებიან, ხდება ინტერაქცია, ცენტრი იგებს რეგიონში რა პრობლემებია, რეგიონი იგებს რა ხდება ცენტრში და ეს ყველაფერი ქალაქისთვის არის ძალიან საინტერესო.... მინდა გამოვყო მუსიკალური ნაწილი, რომელიც ამრავალფეროვნებს ლიტერატურულ ფესტივალს. მუსიკა, პოეზია, ლიტერატურა ერთმანეთისგან განუყოფელი ნაწილია, ისევე როგორც კინო. ძალიან მიხარია რომ ამ თამასას ასე ვთქვათ ვინარჩუნებთ’’, - უთხრა რადიო ,,ათინათს’’ ნიკა ლაშხიამ.

ღონისძიება ხვალ, 14 ივლის დაიხურება. მასში არაერთი მწერალი მონაწილეობს, ორგანიზატორები კი პოეტები გიორგი შონია და ნიკა ლაშხია არიან.

F5 წელს მეექვსედ იმართება.მისი მიზანია სახელოვნებო პროცესის დეცენტრალიზაცია და ახალგაზრდა ხელოვანების ჩართულობით რეგიონში კულტურულ-შემოქმედებითი ცხოვრების ხელშეწყობა.

ამავე თემაზე:

ზუგდიდში თანამედროვე ხელოვნების ფესტივალი F5 მეექვსედ გაიმართება