გალის რაიონში, მზიურის თემის სოფელ შაშიკვარასთან, რამდენიმე დღეა, ნაგავსაყრელი იწვის. ამის შესახებ გალის ე.წ. ადმინისტრაციის წარმომადგენელმა დიმიტრი ადლეიბამ განუცხადა „აფსნიპრესს“.

მისივე ცნობით, ნაგავსაყრელზე გაჩენილი ხანძრისგან წამოსული შავი გამონაბოლქვი მიმდებარედ მცხოვრებ მოსახლეობამდეც აღწევდა.

ადლეიბას თქმით, ხანძარი ამ დროისთვის ლოკალიზებულია, დარჩენილია მხოლოდ მცირე კერები, რომელთა ლიკვიდაციაში, სოხუმის და გალის მეხანძრეები არიან ჩართულები.

„ხანძარი გამოწვეულია ცხელი, მშრალი ამინდით, ამასთან ერთად, გაფუჭებულია სოხუმის ადმინისტრაციის მიერ ამ ნარჩენების დასამარხად გამოყოფილი ტექნიკა. ნაგავსაყრელს ერთი თვის განმავლობაში რამდენჯერმე გაუჩნდა ხანძარი, მაგრამ ჩვენ ჩვენი ძალებით ვაქრობდით მათ“, - განაცხადა მან.

„მადლობა ღმერთს, ქარმა ქალაქისკენ არ დაუბერა, შესაბამისად, დაკვამლიანებისგან სერიოზული ზიანი არ ყოფილა“, - დასძინა ადლეიბამ.

გამოცემის ცნობით, ხანძარი, დაახლოებით, ერთი ჰექტარზე იყო მოდებული, თუმცა „ნაგავსაყრელის ფართობი ძალიან დიდია და ძნელად მისადგომი შესაბამისი ტექნიკისთვის“.

აფხაზური მედიის თანახმად, 2019 წელს სოხუმსა და გალის რაიონს შორის შემდგარი შეთანხმების შედეგად, ნარჩენები სოხუმიდან გალის პოლიგონზე გაიტანეს.