აფხაზეთის დე ფაქტო რესპუბლიკის ე.წ. პარლამენტის ეკონომიკური პოლიტიკისა და რეფორმების კომიტეტი, 18 ივლისს, „აპარტამენტების შესახებ კანონპროექტის“ განხილვას გეგმავს, რომელსაც აქტიურად ლობირებს აფხაზი ლიდერი ასლან ბჟანია , წერს „ეხო კავკაზა“.

ცოტა ხნის წინ, მან ოჩამჩირეში გასვლითი თათბირი გამართა, რომელზეც აღნიშნა, რომ „აპარტამენტების“ შესახებ კანონპროექტი „ოჩამჩირის, ტყვარჩელის და გალის რეგიონების სოციალურ-ეკონომიკური განვითარებისკენ“ იქნება მიმართული, რაც „გადაუდებელ აუცილებლობას წარმოადგენს“.

უფრო ადრე, ბჟანიამ აღნიშნა, რომ „აპარტამენტების შეძენა აფხაზეთის მოქალაქეობას არ უკავშირდება“.

ამავე შეხვედრაზე მან განაცხადა, რომ „აღმოსავლეთ ნაწილში“ ტურიზმის სექტორის გასაძლიერებლად, რუსული ელექტრომატარებელი „ლასტოჩკა“ 2025 წელს ოჩამჩირემდეც ივლის.

გარდა ამისა, მისივე თქმით, ოჩამჩირის საზღვაო პორტში გაიხსნება მსხვილი საწარმო, რომელიც საკონტეინერო და სატვირთო გადაზიდვებს განახორციელებს.

უფრო ადრე, აფხაზმა „დეპუტატმა“ კან კვარჩიამ განაცხადა, რომ ე.წ პარლამენტმა, შესაძლოა, „აპარტამენტების“ შესახებ კანონპროექტი დაჩქარებული წესით, უკვე ივლისის ბოლოს განიხილოს.

მისივე თქმით, დე ფაქტო პრეზიდენტს, ასლან ბჟანიას ე.წ. კანონპროექტის წარდგენა „აღმოსავლეთ აფხაზეთის განვითარების“ საბაბით სურს.

გასული წლის ოქტომბერში ბჟანიამ განაცხადა, რომ ოჩამჩირის რაიონში რუსული სამხედრო-საზღვაო ფლოტის მუდმივი ბაზის განთავსება იგეგმება.

ინფორმაციისთვის, "აპარტ-ოტელებისა და აპარტამენტების სამართლებრივი მდგომარეობის მოწესრიგების შესახებ" კანონპროექტის ინიციატორი აფხაზი ლიდერი, ასლან ბჟანიაა.

მის ინიციატივას მწვავედ აკრიტიკებენ, როგორც ადგილობრივი ოპოზიციური პარტიები, ასევე საზოგადოებრივი ორგანიზაციები.

ოპონენტები მიიჩნევენ, რომ ეს არის უძრავი ქონების გაყიდვის ფარული ფორმა. ბჟანიას "ადმინისტრაციის" მიერ მომზადებული კანონპროექტის მიხედვით, 10-12 წლის განმავლობაში აფხაზეთის მთელ ტერიტორიაზე უნდა აშენდეს აპარტ-ოტელები, ჯამში 30 ათასი აპარტამენტით (ერთ რაიონში არაუმეტეს 5 ათასისა).

ამავე თემაზე:

სოხუმში ორწლიანმა პროტესტმა ოდიოზური კანონების პარალიზება მოახდინა, ახლა ბურთი ენგურს გაღმაა - აფხაზი ვეტერანი „აგენტების“ წინააღმდეგ ქართულ პროტესტზე

აფხაზები დარჩებიან უმცირესობაში, შემდეგ კი საერთოდ გაქრებიან, - აქტივისტები „აპარტამენტების“ კანონზე

არძინბამ "აპარტამენტების შესახებ კანონის" კრიტოკოსების განცხადებებს "იდიოტური" უწოდა

სოხუმში აპარტამენტების კანონის ამოქმედების და ანექსიის საფრთხეებზე - DRI