გარემოს დაცვისა და სოფლის მეურნეობის მინისტრი ოთარ შამუგია, სამეგრელო-ზემო სვანეთის სახელმწიფო რწმუნებული გიორგი გუგუჩია, ზუგდიდის მერი მამუკა წოწერია და სხვა ოფიციალური პირები ზუგდიდში მოქმედი თხილის შემნახველი და გადამმუშავებელი საწარმოების წარმომადგენლებს შეხვდნენ. ამის შესახებ ინფორმაციას სამინისტრო საკუთარ ვებ გვერდზე ავრცელებს.

მათი ცნობით, სამეგრელო-ზემო სვანეთის რეგიონში 12 ახალი საწარმო შეიქმნა, თანადაფინანსების ოდენობა კი 5.6 მლნ ლარს შეადგენს.

"სახელმწიფოს მხარდაჭერით შენდება თხილის ახალი ბაღები, იქმნება შემნახველი და გადამმუშავებელი ინფრასტრუქტურა, ფერმერებისათვის ხელმისაწვდომია მხარდაჭერა საერთაშორისო სტანდარტების დანერგვის მიმართულებით, რაც ექსპორტის გაზრდისა და საექსპორტო ბაზრების გაფართოების წინაპირობაა", - თქვა ოთარ შამუგიამ მწარმოებლებთან გამართულ შეხვედრაზე.

ვებ გვერდზე ვკითხულობთ, რომ გიორგი გუგუჩიამ შეხვედრაზე ყურადღება დარგობრივი ცოდნის მნიშვნელობაზე გაამახვილა და აღნიშნა, რომ 600-მდე ტრენინგი, რომელიც სახელმწიფოს ხელშეწყობით ჩატარდა, პირდაპირპროპორციულად ისახება წარმოებაზე და თხილის გაუმჯობესებულ ხარისხზე, რაც კონკურენტუნარიანობის აუცილებელი პირობაა.

მათივე განმარტებით, პროექტის ,,შეღავათიანი აგროკრედიტი" ფარგლებში, თხილის შენახვა-გადამუშავების მიზნობრიობით რეგიონში 39 მლნ ლარის სესხი გაიცა.