სოხუმში, "პარლამენტის" შენობაში გაიმართა შეხვედრა, რომელშიც 21" დეპუტატი" მონაწილეობდა. ტელეგრამის არხების თანახმად, ცნობილი გახდა, რომ დღეს, 18 ნოემბერს შეიძლება პირდაპირი მოლაპარაკებები გაიმართოს "ხელისუფლებასა" და ადგილობრივ ოპოზიციას შორის.

აფხაზური ოპოზიციის ერთ-ერთმა ლიდერმა, "დეპუტატმა" კან კვარჩიამ იმედი გამოთქვა, რომ ყველა საკითხი დღესვე მოგვარდება. წინააღმდეგ შემთხვევაში, მისი თქმით, "ყველა შესაძლებლობა ამოიწურება და ოპოზიციაც გარკვეულ დასკვნებს გამოიტანს“.

18 ნოემბერს აფხაზეთის დე ფაქტო ლიდერის პრესსამსახურმა გაავრცელა ინფორმაცია, რომ ბჟანიამ გამართა "უშიშროების საბჭოს" სხდომა, რომელზეც განიხილეს არსებული ვითარება და მისი სტაბილიზაციის ზომები.

შეხვედრა, სავარაუდოდ, გაიმართა სოფელ ტამიშში, სადაც ბჟანია 15 ნოემბრიდან იმყოფებოდა.

ბჟანიას პრესსამსახურში აცხადებენ, რომ 18:00 საათამდე ცნობილი გახდება დელეგაციის შემადგენლობა, რომელიც ოპოზიციასთან პირდაპირ მოლაპარაკებებს გამართავს.

17 ნოემბერს პროეტსტის მონაწილეებმა განაცხადეს, რომ იმ შემთხვევაში, თუ ასლან ბჟანიას გადადგომის მოთხოვნა არ დაკმაყოფილდება, ოპოზიციის საკოორდინაციო საბჭომ, შესაძლოა, დროებითი მთავრობა შექმნას.

მასშტაბური აქციები სოხუმში 15 ნოემბერს დაიწყო. დილიდან აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი. თვადაპირველად, აქციის მონაწილეები, რუსეთთან საინვესტიციო ხელშეკრულების გაუქმებას ითხოვდნენ, უფრო გვიან კი მთავარი მოთხოვნა გააჟღერეს - „პრეზიდენტის უპირობო გადადგომა“.