ზუგდიდის შოთა მესხიას სახელმწიფო უნივერსიტეტის სტუდენტების ნაწილი, რომლებიც 6 ღამეა უნივერიტეტის ფოიეში საპარლამენტო არჩევნების შედეგებს აპროტესტებს, ხვალ, 25 ნოემბერს, თბილისში დაანონებულ აქციას შეუერთდებიან.

მათ მიერ გავრცელებულ განცხადებაში აღნიშნულია, რომ სტუდენტების პროტესტი, სხვა ფორმით რუსული რეჟიმის წინააღმდეგ გაგრძელდება. 

,,ზუგდიდის შოთა მესხიას სახელმწიფო უნივერსიტეტის სტუდენტების ნაწილმა 6 საპროტესტო ღამე გავათენეთ უნივერსიტეტის კედლებში. ჩვენი მთავარი სათქმელი პროტესტის დასაწყისში იყო და ახლაც არის ის, რომ არჩევნები გაყალბდა! გაყალბდა სახელოვნად. ჩვენი ხმები მოიპარეს და ჩვენ ვალდებული ვართ ვიბრძოლოთ ამ მოპარული ხმების დასაბრუნებლად.მადლობა თითოეულ თქვენგანს, ვინც მოხვედით, დაგვირეკეთ, მოგვწერეთ, ჩვენს შესახებ სხვებს მოუყევით. თქვენი მხარდაჭერა გვაფიქრებინებს, რომ მარტო არ ვართ, რომ ჩვენ ვართ ბევრნი, ჩვენ ვართ უმრავლესობა, ვისაც ამ ქვეყნის ნათელი, ევროპული მომავალი უნდა.დღეიდან ჩვენ ვწყვეტთ პროტესტის ამ კონკრეტულ ფორმას, თუმცა, ვაგრძელებთ ბრძოლას რუსული რეჟიმის წინააღმდეგ და ვუერთდებით ხვალ დედაქალაქში დილის 9 საათიდან დაგეგმილ აქციას, რადგან ვთვლით, რომ მთავარი ბრძოლის ველი ახლა არის პარლამენტთან, იქ, სადაც ხმების ქურდი ხელისუფლება ცდილობს თვითლეგიტიმაციას. მოგიწოდებთ ყველას, ვინც თვლით, რომ თქვენი ხმა მოიპარეს, შემოგვიერთდით ამ საერთო ბრძოლაში, რადგან გამარჯვება მხოლოდ ერთიანობით მიიღწევა’’, - აღნიშნულია მათ მიერ გავრცელებულ განცხადებაში.

შეგახსენებთ, 16 ნოემბერს, ამავე უნივერსიტეტის სტუდენტების ნაწილმა გაავრცელა განცხადება, რომელშიც აღნიშნულია, რომ ისინი არ აღიარებენ არჩევნების ლეგიტიმურობას და სოლიდარობას უცხადებენ საქართველოს სხვადასხვა უნივერსიტეტის სტუდენტებს, რომლებიც 26 ოქტომბრის არჩევნების გაყალბებას აპროტესტებენ.

ამავე თემაზე:

ზუგდიდის შოთა მესხიას სახელმწიფო უნივერსიტეტში სტუდენტების ნაწილი პროტესტის ნიშნად ღამეს გაათენებს

ზუგდიდის შოთა მესხიას უნივერსიტეტში სტუდენტების ნაწილის პროტესტი გრძელდება