ჩხოროწყუში მოქალაქეების ნაწილი ევროკავშირთან მოლაპარაკებების პროცესის 2028 წლამდე შეჩერების შესახებ "ქართული ოცნების" გადაწყვეტილებას მეორე დღეა აპროტესტებს. ისინი მიიჩნევენ, რომ აღნიშნული ნაბიჯი საქართველოს ევროატლანტიკური პერსპექტივისთვის საფრთხეს შეიცავს და ეწინააღმდეგება საქართველოს კონსტიტუციის 78-ე მუხლს, რომელიც ხელისუფლებას ევროატლანტიკური კურსის მტკიცე ხელშეწყობაზე მიუთითებს.

"ჩხოროწყუ მხნედ არის. როდესაც ქვეყნისთვის მნიშვნელოვანი მომენტი დგება, ჩვენ ვდებთ ყოველგვარ პარტიულ იდეოლოგიას გვერდზე და ქვეყნის ინტერესებისთვის ვვერთიანდებით. დღევანდელი აქციაც, ცხადია, ამის გამოხატულება იყო. ერთად იდგა ყველა ოპოზიციური პარტია, სამოქალაქო აქტივისტები, რიგითი მოქალაქეები და ყველა მათგანი იდგა იქ მთავარი იდეის გარშემო, საქართველოს ევროპული მომავლის იდეის ირგვლივ იყვნენ გაერთიანებული. მნიშვნელოვანია, რომ ყველამ გავითავისოთ, არ აქვს პარტიას და იდეოლოგიურ განსხვავებას მნიშვნელობა. ჩვენი მთავარი იდეოლოგიაა, რასაც თაობები შეეწირა. სწორედ ევროპული იდენტობა და ევროპული ოჯახის ნაწილად ყოფნა იყო მთავარი. სამწუხაროდ, ჩვენი ხელისუფლება ყველაფერს აკეთებს, რომ ეს ყველაფერი დაგვაკარგვინოს. არ მგონია, რომ ქართული საზოგადოება ამას შეეგუება. მით უფრო, ეს გადაწყვეტილება პირდაპირ კონსტიტუციის დარღვევაა", - ამბობს ერთ-ერთი მოქალაქე ჩხოროწყუდან, ოთო შენგელია.

მისივე განმარტებით, ქვეყნის განათლების სისტემისთვის მნიშვნელოვანი გაცვლითი პროგრამები, სწორედ ამერიკული და დასავლური ფინანსური მხარდაჭერით ხორციელდება და "ქართული ოცნების" გადაწყვეტილება საფრთხეს უქმნის მაღალი ხარისხის განათლების მიღებასაც.

"წელიწადი არ გადის, "ფლექსის" პროგრამით, ჩხოროწყუდან მინიმუმ ერთი მოსწავლე არ წავიდეს ამერიკაში, ასევე, სტუდენტები ერაზმუსის პროგრამით ევროპაში. რა თქმა, უნდა ვერცერთი მათგანი ამერიკული და ევროპული ფინანსური მხარდაჭერის გარეშე ვერ მიიღებდა ამ ხარისხის განათლებას. საქართველოში არავის სურს ავტოკრატია. საქართველოში ყოველი თაობა თავისუფლებისთვის იბრძოდა და არც ჩვენი თაობა იქნება გამონაკლისი. რუსულ ჩექმას და მონობას არ შევეგუებით", - დასძენს იგი.

კიდევ ერთი ჩხოროწყუელი, თეონა ახალაია რადიო "ათინათთან" ამბობს, რომ აქციას შეუერთდა ქვეყნის რუსიფიკაციისგან გათავისუფლების მიზნით, რადგან დღეს ევროპული მომავალი გადასარჩენია.

"საქართველოში მიმდინარე ამ ცუდი მოვლენების გამო, იმ ჩხოროწყუელებმა, ვინც ვერ ვახერხებთ ჯერჯერობით თბილისში ჩასვლას, საჭიროდ ჩათვალეთ, ჩვენს ქალაქში გამოგვეხატა ერთიანი პოზიცია. ვნახე რომ დაანონსდა აქცია, გამიხარდა, მეც სიხარულით შევუერთდი და ასე გავერთიანდით და ხვალინდელი ბრძოლის სტიმული მივეცით ერთმანეთს. ჩვენი ქვეყანა გადასარჩენია რუსიფიკაციისაგან და აქ თითოეულმა მოქალაქემ თავისი აზრი უნდა დააფიქსიროს და თანადგომა უნდა გამოხატოს ღირსეული მოქალაქეების მიმართ, ვინც იბრძვის ევროპული და უკეთესი საქართველოსთვის".

შეგახსენებთ, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში საპროტესტო აქციები იმართება. დღეს, ზუგდიდში მოქალაქეები, სამოქალაქო აქტივისტები, არასამთავრობო ორგანიზაციების წარმომადგენლები და პოლიტიკოსები სამხარეო ადმინისტრაციის შენობის წინ შეიკრიბნენ. მათ ასევე მსვლელობით მოიარეს ქალაქის ქუჩები. მათი თქმით, დღეს საქართველოს ევროპული მომავლის ბედი წყდება და მნიშვნელოვანია, ყველამ დაიცვას ქვეყნის ისტორიული არჩევანი.