წალენჯიხის მუნიციპალიტეტის მერია სოციალურ ქსელში განცხადებას ავრცელებს და აღნიშნავს, რომ ბოლო პერიოდში ცენტრალური ხელისუფლების მხრიდან განხორციელებული ქმედებები სცდება ქვეყნის კონსტიტუციურ ფარგლებს და აშკარა საფრთხეს უქმნის საქართველოს ევროპულ მომავალს, ევროატლანტიკურ სივრცეში ქვეყნის ინტეგრაციას.

"ხელისუფლებამ ხალხის ხმების მიტაცებით არჩევნების გაყალბება არ იკმარა და ქვეყანაში საკონსტიტუციო გადატრიალება მოაწყო - საკონსტიტუციო სასამართლოში პრეზიდენტის მიერ შეტანილი სარჩელის მოუხედავად შეიკრიბა პარლამენტში, ერთპიროვნულად ერთპარტიულ სხდომაზე მთავრობას ნდობა გამოუცხადა და ბოლოს, საქართველოს კონსტიტუციის 78-ე მუხლიც უგულებელყო.

ორი დღე-ღამეა, ქვეყნის მთავარ გამზირზე ფიზიკურად დაუპირისპირდა მშვიდობიან მომიტინგეებსა და მედიის წარმომადგენლებს, რითაც თავისუფალი აზრის გამოხატვა შეზღუდა", - ვკითხულობთ მერიის გვერდზე.

განცხადებაში ასევე აღნიშნულია, რომ წალენჯიხის კოალიციური თვითმმართველობა, რომელიც ქვეყანაში ერთადერთი ოპოზიციური მუნიციპალიტეტია, ქართული სახელმწიფოს რუსულ სივრცეში დაბრუნების აშკარა საფრთხედ მიიჩნევს.

ცნობისთვის, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში საპროტესტო აქციები იმართება. ზუგდიდში მოქალაქეების ნაწილი 28 ნოემბრიდან აპროტესტებს ხელისუფლების გადაწყვეტილებას. აქცია დღესაც გაიმართება, სამეგრელო-ზემო სვანეთის სამხარეო ადმინისტრაციის წინ. თბილისში, შინაგან საქმეთა სამინისტროს დანაყოფებმა რუსთაველის გამზირზე მიმდინარე აქცია, უკვე მეორედ, ძალის გამოყენებით დაშალეს. პროფესიული მოვალეობის შესრულებისას, პოლიციამ ფიზიკურად იძალადა ჟურნალისტებზე და ოპერატორებზე. დაშავებულებს შორის არიან სამოქალაქო აქტივისტები, მოქალაქეები და პოლიტიკოსები.


ამავე თემაზე: 

აბა ულა ევროპაშა - აქცია ჩხოროწყუში (ფოტო)

რუსეთი მტერია, გამარჯვება გარდაუვალია - მოძრაობა "ბალდის კანიონის შესანარჩუნებლად"

ხელისუფლების უარი ევროკავშირთან მოლაპარაკების გახსნაზე არის ყველაზე მოღალატეობრივი, რაც აქამდე გვინახავს, - ლევან პაპავა

ზუგდიდელები ევროკავშირთან მოლაპარაკებების გახსნის საკითხის 2028 წლამდე შეჩერებას აპროტესტებენ (ფოტორეპორტაჟი)

დღეს რაც ხდება, ეს არის ერის ღალატი, - ზუგდიდში აქციის მონაწილეებმა შეკრებილებს მიმართეს (ფოტო/ვიდეო)

ეს არის წინააღმდეგობის მოძრაობა და მე ვიქნები პრეზიდენტი ბოლომდე, - სალომე ზურაბიშვილი