საქართველოს სხვადასხვა ქალაქში, მათ შორის ზუგდიდში წინასაახალწლო მზადება იწყება. ქალაქის ცენტრალურ მოედანზე ჯერჯერობით ვერ ნახავთ ილუმინაციებსა და განათებებს, თუმცა, ზუგდიდის მუნიციპალიტეტის მერიის პრესსამსახურის ცნობით, ზუგდიდში განათებების მოწყობა აქტიურად მიმდინარეობს.

შეკითხვაზე, განთავსდება თუ არა ქალაქის მთავარი ნაძვის ხე სამეგრელო-ზემო სვანეთის სამხარეო ადმინისტრაციის შენობის მიმდებარედ, ადგილობრივი ხელისუფლების პრესსამსახური არ პასუხობს, თუმცა ამბობენ, რომ ის, წინა წლის მსგავსად, წელსაც დაგეგმილ დროს აინთება.

შეგახსენებთ, გასულ წელს, სამხარეო ადმინისტრაციის შენობის წინ, ნაძვის ხის კონსტრუქციების მონტაჟი 21 ნოემბრიდან დაიწყო და 22 დეკემბერს საზეიმოდ განათდა. მაშინ საქართველო ახალი წლის დადგომასთან ერთად, ევროკავშირის კანდიდატის სტატუსის მიღებას აღნიშნავდა. ქალაქის ყოველ კუთხეში შეხვდებოდით როგორც საახალწლო ილუმინაციებსა და დეკორაციებს, ასევე, საქართველოს, ევროკავშირისა და წევრი სახელმწიფოების დროშებს.

ინფორმაციისთვის, 2024 წელს, ზუგდიდის მუნიციპალიტეტის მერია ქალაქის ცენტრალურ მოედანზე ღონისძიებების ორგანიზებისთვის 93 870 ლარს დახარჯავს, რაც 2023 წელს ამავე ტიპის ღონისძიებისთვის გამოყოფილ თანხას 7 030 ლარით აღემატება.