სოხუმში, ე.წ. პარლამენტში მომხდარ სროლასთან დაკავშირებით, აფხაზეთის დე ფაქტო რესპუბლიკის „პრეზიდენტის“ მოვალეობის შემსრულებელი ბადრა გუნბა „უშიშროების საბჭოს“ სხდომას იწვევს.

„ბადრა გუნბა იწვევს უშიშროების საბჭოს სხდომას პარლამენტში მომხდარ სროლასთან დაკავშირებით, რის შედეგადაც, ერთი დეპუტატი დაიღუპა და მეორე დაშავდა“, - ამის შესახებ TASS - ს ე.წ. ადმინისტრაციის წარმომადგენელმა განუცხადა.

ამავე ცნობით, სამართალდამცავი ორგანოები აწარმოებენ ოპერატიულ - სამძებრო სამუშაოებს, სროლაში ეჭვმიტანილი „დეპუტატის“ ადგურ ხარაზიას დასაკავებლად.

„უმოკლეს დროში აღიძვრება სისხლის სამართლის საქმე, განვსაზღვრავთ კვალიფიკაციას“, - განაცხადა „გენერალური პროკურორის“ მოადგილემ რუსლან ტირკბამ.

„აფსნიპრესის“ თანახმად, დანაშაულში ეჭვმიტანილის დასაკავებლად, დაწყებულია სამძებრო მოქმედებები.

„ფსოუ-ენგურის გზატკეცილზე, საგზაო ინსპექციის საგუშაგოები საგანგებო რეჟიმში მუშაობენ, ასევე აკონტროლებენ სახელმწიფო -სასაზღვრო ზონებსაც. ოპერატიულ საქმიანობაში ჩართულები არიან ქალაქ სოხუმის, გულრიფშის რაიონის შინაგან საქმეთა განყოფილებების თანამშრომლები და უწყების ცენტრალური აპარატის ძალოვანი ქვედანაყოფები“, - იუწყება დე ფაქტო შსს-ს პრესსამსახური.

პარლამენტში მომხდარი სროლის შედეგად, „დეპუტატი“ ვახტანგ გოლანძია, მიყენებული ჭრილობებით, საავადმყოფოში გარდაიცვალა, დაჭრილ კან კვარჩიას კი შესაბამისი სამედიცინო დახმარება ეწევა.

თვითმხილველი „დეპუტატების“ ინფორმაციით, კონფლიქტი კან კვარჩიასა და ადგურ ხარაზიას შორის, „საკომიტეტო“ სხდომაზე წარმოიშვა, რა დროსაც, მაინინგის და კრიპტოვალუტის უკანონოდ მოპოვების ამკრძალავი კანონპროექტი განიხილებოდა.