აფხაზეთის თვითაღიარებული რესპუბლიკის ე.წ. პრეზიდენტის მოვალეობის შემსრულებელმა ბადრა გუნბამ გასცა განკარგულება, დე ფაქტო შსს - ს ბაზაზე შესაბამისი სტრუქტურული ერთეულის შექმნის შესახებ, რომელიც უკანონო მაინინგთან იბრძოლებს.

ინფორმაციისთვის, სწორედ კრიპტოვალუტის მაინინგთან ბრძოლა და ენერგოკრიზისი იყო 19 დეკემბერს, ე.წ. პარლამენტში განხილვის თემა, რასაც „დეპუტატებს“ შორის დაპირისპირება და სროლა მოჰყვა. შედეგად, მიყენებული ჭრილობებისგან გარდაიცვალა ვახტანგ გოლანძია, კან კვარჩია კი დაიჭრა.

ადგილიდან მიიმალა სროლაში ეჭვმიტანილი ადგურ ხარაზია, რომელსაც ამ დრომდე ეძებენ.

ცნობისთვის, 23 დეკემბრიდან რუსეთმა ოკუპირებული აფხაზეთისთვის ელექტროენერგიის ჰუმანიტარული ნაკადის მიწოდება განაახლა. 

ნოემბრის დასაწყისში, მოსკოვმა სოხუმს უფასო ელექტროენერგიის მიწოდება შეუწყვიტა. 11 დეკემბრიდან მოსახლეობას დღისით არასრული სამ საათით მიეწოდებოდა დენი, ღამით კი 21:00 საათიდან 07:00 საათამდე.