წალენჯიხის მუნიციპალიტეტის მერია სოციალურ ქსელში განცხადებას ავრცელებს, რომელშიც წერს, რომ ქვეყანაში მიმდინარე მოვლენების ფონზე, წალენჯიხის მოსახლეობის და მუნიციპალიტეტის მერიის ოფიციალური პოზიციაა, რომ მუნიციპალიტეტში საახალწლო ზეიმი და კონცერტი არ ჩატარდეს.

მათი თქმით, მიუხედავად იმისა, რომ გადაწყვეტილება ყველა მხარესთან შეთანხმებით მიიღეს, "ქართულმა ოცნებამ" პოზიცია ბოლო დღეს შეცვალა და გადაწყვიტა წალენჯიხაში კონცერტის გამართვა.

"ხაზგასმით ვაფიქსირებთ, რომ არსებული მოვლენების ფონზე, მუნიციპალიტეტის მერია კატეგორიული წინააღმდეგია თვითმარქვია მთავრობის მიერ დაგეგმილი კონცერტის გამართვის. ასევე აღსანიშნავია, რომ რაიმე სახის ღონისძიებაზე მერიას არ გაუცია ნებართვა და ყველა ღონისძიება რაც გაიმართება ქართულ ოცნების მიერ არის უკანონო. მოვუწოდებთ სამართალდამცავ ორგანოებს, რომ მიიღონ შესაბამისი კანონიერი ზომები უკანონო ღონისძიებების მიმართ.

საზოგადოებას მოეხსენება, რომ წალენჯიხამ ახლახან დაკარგა გამორჩეული ადამიანი, არჩეული მერი, გიორგი ხარჩილავა.

ევროპული მომავლისათვის ბრძოლის პროცესში კი ვხედავთ, თუ რამდენი ადამიანია უმოწყალოდ ნაცემი, დასახიჩრებული და უკანონოდ დაკავებული.

სწორედ ამ მიზეზების გამო, მოსახლეობამ სამართლიანად ჩათვალა, რომ კონცერტი და ტაშ-ფანდური უადგილოა წალენჯიხაში. სამწუხაროა, რომ ქართული ოცნებისათვის არანაირ ღირებულებას არ წარმოადგენს ქართული, მეგრული ტრადიციები და ჯიუტად ცდილობს, მოსახლეობის ნების წინააღმდეგ წასვლას", - ვკითხულობთ განცხადებაში.

მერია მიმართავს კონცერტში მონაწილე ყველა პირს, უარი თქვან მასში მონაწილეობაზე და აცხადებენ, რომ წალენჯიხელებისათვის ძალიან მტკივნეული და მიუღებელია "ქართული ოცნების" ნაბიჯი.