“აფხაზეთის სახალხო პარტიამ” შამილ აძინბა თვითგამოცხადებული რესპუბლიკის პრეზიდენტობის კანდიდატად წარადგინა. ამის შესახებ "აიაშარა" წერს.

ამავე ინფორმაციით, შამილ აძინბა არის პოლიტიკოსი, ქართულ-აფხაზური ომის ვეტერანი, ოკუპირებული აფხაზეთის ყოფილი „პირველი ვიცე-პრემიერი“.

აქვე ვკითხულობთ, რომ 2011 წელს აძინბამ კენჭი იყარა „ვიცე-პრეზიდენტობის“ კანდიდატად „პრეზიდენტობის“ კანდიდატ სერგეი შამბასთან ერთად. 2019 წლის „საპრეზიდენტო“ არჩევნებში მან ხმების 4,14% მიიღო.

არჩევნებში, რომელიც 2025 წლის 15 თებერვალს გაიმართება, შამილ აძინბას გარდა „პრეზიდენტობისთვის“ იბრძოლებენ, აფხაზეთის დე ფქტო რესპუბლიკის „პრეზიდენტის“ მოვალეობის შემსრულებელი ბადრა გუნბა, ოპოზიციის ერთ-ერთი ლიდერი, ეკონომიკის ყოფილი „მინისტრი“ ადგურ არძინბა, რუსეთის ფედერაციაში „აფხაზეთის სავაჭრო პალატის“ ყოფილი წარმომადგენელი, ოლეგ ბარციცი და „კონტროლის პალატის“ ყოფილი ხელმძღვანელი რობერტ არშბა.

აფხაზეთის თვითგამოცხადებული რესპუბლიკის “პრეზიდენტი” ასლან ბჟანია თანამდებობიდან 19 ნოემბერს გადადგა.

15 ნოემბერს აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი, რასაც ოპოზიციური ძალების პროტესტი და ბჟანიას გადადგომა მოჰყვა.

მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.

პასუხად, მოსკოვმა ჯერ ნაწილობრივ, შემდეგ კი სრულად შეუჩერა სოხუმს ბიუჯეტის დაფინანსება.