აფხაზეთის დე ფაქტო რესპუბლიკის ცენტრალურმა საარჩევნო კომისიამ კან კვარჩიას „საპრეზიდენტო“ კანდიდატად წარდგენის საინიციატივო ჯგუფი დაარეგისტრირა.

ოპოზიციური საზოგადოებრივი ორგანიზაცია „აიდგილარას“ ლიდერი, „დეპუტატი“ და სოხუმის ყოფილი „მერი“, კან კვარჩია , 19 დეკემბერს, ე.წ. პარლამენტის შენობაში მისი კოლეგის ადგურ ხარაზიას გასროლის შედეგად დაიჭრა.

ცეცხლსასროლი იარაღიდან მიყენებული ჭრილობებისგან გარდაიცვალა „დეპუტატი“ ვახტანგ გოლანძია. კვარჩია საავადმყოფოდან რამდენიმე დღის წინ გაწერეს.

მკვლელობაში ეჭვმიტანილ ადგურ ხარაზიას, ამ დრომდე ეძებენ. 


„ეხო კავკაზას“ თანახმად, ოკუპირებულ აფხაზეთში „პრეზიდენტობის“ პოტენციური კანდიდატების რაოდენობა რვამდე გაიზარდა.

ამავე ცნობით, თებერვალში დანიშნულ არჩევნებში კენჭს იყრიან, „პრეზიდენტის“ მოვალეობის შემსრულებელი ბადრა გუნბა; ეკონომიკის ყოფილი „მინისტრი“, „აფხაზეთის სახალხო მოძრაობის“ ლიდერი -ადგურ არძინბა; მოსკოვში სოხუმის „სავაჭრო პალატის“ წარმომადგენელი - ოლეგ ბარციცი; „კონტროლის პალატის“ ყოფილი ხელმძღვანელი - რობერტ არშბა; „შავი ზღვის განვითარების ბანკის“ გამგეობის თავმჯდომარე ადგურ ხურუმალი; სახალხო პარტიის თავმჯდომარე შამილ აძინბა.

აფხაზეთის თვითგამოცხადებული რესპუბლიკის “პრეზიდენტი” ასლან ბჟანია თანამდებობიდან 19 ნოემბერს გადადგა.


15 ნოემბერს აფხაზეთის დე ფაქტო რესპუბლიკის ე.წ. პარლამენტში ჩაიშალა სოხუმსა და მოსკოვს შორის საინვესტიციო ხელშეკრულების რატიფიცირების პროცესი, რასაც ოპოზიციური ძალების პროტესტი და ბჟანიას გადადგომა მოჰყვა.

მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.

პასუხად, მოსკოვმა ჯერ ნაწილობრივ, შემდეგ კი სრულად შეუჩერა სოხუმს ბიუჯეტის დაფინანსება.