ზუგდიდში უწყვეტი პროტესტი გრძელდება. მოქალაქეები, არასამთავრობო ორგანიზაციების და სხვადასხვა ოპოზიციური პარტიების წარმომადგენელები, მასწავლებლები, სტუდენტები და აბიტურიენტები უკვე 38- ე დღეა იკრიბებიან ქალაქის ცენტრში, სახელმწიფო რწმუნებულის ადმინისტრაციასთან.
მათი მოთხოვნები უცვლელი რჩება: აქციის დარბევისას დაპატიმრებული ადამიანების გათავისუფლება და ხელახალი არჩევნები.

დღევანდელ აქციაზე აღინიშნა, რომ აქციის ორგანიზატორებმა, რომლებიც გაერთიანებულები არიან “სამოქალაქო სოლიდარობის ფონდში“, საქართველოს მეხუთე პრეზიდენტს, სალომე ზურაბიშვილს მიმართეს და მოიწვიეს ზუგდიდში, მალევე ამ წინადადებაზე მისგან თანხმობაც მიიღეს.

“სამოქალაქო სოლიდარობის ფონდმა მიმართა სალომე ზურაბიშვილს წინადადებით, იგი მისთვის სასურველ ერთ რომელიმე დღეს შემორთებოდა ზუგდიდში გასამართ აქციას, რომელიც უახლოეს დღეებში იქნება და ზურაბიშვილისგან ჩვენ გვაქვს თანხმობა და ორშაბათს გვეცოდინება, თუ როდის ეწვევა საქართველოს პრეზიდენტი სალომე ზურაბიშვილი ზუგდიდს და ის შემოუერთდება ჩვენს აქციას“, - უთხრა შეკრებილებს არჩილ თოდუამ.

აქციაზე მონაწილეებმა, ისევე, როგორც წინა დღეებში, საქართველოს და ევროკავშირის დროშები მიიტანეს ასევე ბანერები პროევროპული წარწერებით.

ცნობისთვის, მას შემდეგ, რაც 28 ნოემბერს, ირაკლი კობახიძემ განაცხადა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს სხვადასხვა ქალაქში, მათ შორის ზუგდიდში, საპროტესტო აქციები იმართება.