ტყვარჩელის რაიონში, ელექტროენერგიის გათიშვის დროს, აკარმარას ფიდერთან 300 მეტრის სიგრძის მავთული მოიპარეს.

ინციდენტის შედეგად, 6 დასახლებული პუნქტი, ელექტროენერგიის გარეშე დარჩა. ინფორმაციას „ჩერნომორენერგო“ ავრცელებს. ამავე ცნობით, მათ უკვე მიმართეს სამართალდამცავ ორგანოებს.

აფხაზეთის დე ფაქტო რესპუბლიკაში, 9 იანვრიდან, ელექტროენერგიის მიწოდებაზე ახალი შეზღუდვები ამოქმედდა. გრაფიკის თანახმად, დენი დღე - ღამის განმსვლობაში, 6 საათით ითიშება.

აფხაზური ენერგოკომპანიის დირექტორმა, იანვრის დასაწყისში განაცხადა, რომ ლექტროენერგიის მიმდინარე მოხმარების გათვალისწინებით, სოხუმმა შესაძლოა 18 თებერვლამდე ამოწუროს მოსკოვისგან მიღებული „სოციალური ნაკადის“ ლიმიტი.

ცნობისთვის, რუსეთმა ოკუპირებული აფხაზეთისთვის ელექტროენერგიის ჰუმანიტარული ნაკადის მიწოდება 2024 წლის 23 დეკემბერს დაიწყო.

2024 წლის ნოემბრის დასაწყისში, მოსკოვმა სოხუმს უფასო ელექტროენერგიის მიწოდება შეუწყვიტა.

11 დეკემბრიდან მოსახლეობას დღისით არასრული სამ საათით მიეწოდებოდა დენი, ღამით კი 21:00 საათიდან 07:00 საათამდე.

აფხაზი ლიდერის ასლან ბჟანიას გადადგომის და ე.წ. პარლამენტის მიერ მოსკოვთან „საინვესტიციო ხელშეკრულების“ ჩაგდების შემდეგ, რუსეთმა სრულად შეუჩერა დე ფაქტო რესპუბლიკას დაფინანსება.

უკვე წლებია, სოხუმი ენერგოდეფიციტის აღმოფხვრას ვერ ახერხებს. ადგილობრივი ენერგოკომპანია ამის მიზეზად ელექტროქსელებზე გაზრდილ დატვირთვას და ინფრასტრუქტურის ცვეთას, სრული გამრიცხველიანების არარსებობას, ელექტროენერგიაზე დაბალ ტარიფებს, მოსახლეობის ნაწილის მიერ ელექტროენერგიის საფასურის გადაუხდელობას და კრიპტოვალუტის უკანონო მაინინგს ასახელებს.

ინფორმაციისთვის, ზამთრის თვეებში ენგურჰესი, ძირითადად, აფხაზური მხარის საჭიროებებს აკმაყოფილებდა. მხარეებს შორის არსებული შეთანხმება გამომუშავებული რესურსის 60/40-ზე პარიტეტით გადანაწილებას გულისხმობს.