დღეს, 18 იანვარს, თბილისში, მოქალაქეები სოლიდარობას უცხადებენ ზუგდიდელ აქტივისტ ქალებს, რომლებიც არაერთხელ დააჯარიმეს აქციაზე ნიღბის ტარების და ფეიერვერკის გამოყენების გამო.

ინფორმაცია ჯგუფ „დაიტოვეში“ გავრცელდა ·

"არალეგიტიმურ პარლამენტს არ შეუძლია მიიღოს კანონი. შესაბამისად, ჩვენ არ ვემორჩილებით ივანიშვილის “პარლამენტისა” და მისი პირადი “პრეზიდენტის” მიერ დამტკიცებულ შეზღუდვებს! თანამებრძოლებო, ჩვენი პროტესტი ახალ ფაზაში გადადის, განახლებული ენერგიით! სოლიდარობას ვუცხადებთ დაკავებულ მარიამ სიჭინავას და სხვა ზუგდიდელ აქტივისტებს. მოგიწოდებთ, შემოგვიერთდეთ დაუმორჩილებლობის მსვლელობაში. აუცილებელია, რომ ვიყოთ პუნქტუალურები და უშიშრები. ჩვენს უსაფრთხოებას განსაზღვრავს ჩვენი რაოდენობა! გაბედე და გამოდი!", - ვკითხულობთ ღონისძიების აღწერაში, რომლის ორგანიზატორია "დაიტოვე".

დაუმორჩილებლობის მსვლელობაა ფილარმონიასთან 20:30 საათზე დაიწყება.

ცნობისთვის, ზუგდიდში 16 იანვარს აქციაზე პიროტექნიკის გასროლის გამო, აქტივისტები მარიამ სიჭინავა და კერენ ესებუა დააკავეს. ასევე პოლიციის სამმართველოსთან, იმავე დღეს, საპროტესტო აქციის დროს, პიროტექნიკის გასროლის გამო, მასწავლებელი მანანა (მიკო) მიქავა დააკავეს. მან ფეიერვერკი დაკავებული კერენ ესებუას და მარიამ სიჭინავას მიმართ სოლიდარობის ნიშნად გაისროლა. მოგვიანებით, ის ხელწერილის საფუძველზე გაათავისუფლეს. საქმეზე გადაწყვეტილება მოსამართლემ გვანცა ვარდანიძემ მიიღო და მასწავლებელს ადმინისტრაციულ სახდელად 5000 ლარი დააკისრა.

რაიონულ სასამართლოში პარტია "დროას" რეგიონული წარმომადგენლისა და აქტივისტის მარიამ სიჭინავას სასამართლო პროცესი 15 იანვარს გაიმართა. სასამართლომ აქტივისტი პიროტექნიკის გამოყენების ორ, ხოლო ბალაკლავას ტარების ექვს ეპიზოდშივე სამართალდამრღვევად ცნო და ადმინისტრაციული სახდელის სახით 5000 ლარი დააკისრა. ის 13 იანვარს, დააკავეს და სამტრედიის დროებითი მოთავსების იზოლატორში გადაიყვანეს.