ზუგდიდში პროტესტის 54- ე დღეს, სახელმწიფო რწმუნებულის ადმინისტრაციის შენობის წინ მოქალაქეები ისევ შეიკრიბნენ უცვლელი მოთხოვნით, გათავისუფლდნენ რეჟიმის პატიმრები და ჩატარდეს ხელახალი, სამართლიანი არჩევნები.

აქციაზე სხვადასხვა სფეროს წარმომადგენლებმა შეკრებილებს მიმართეს და მიმოიხილეს ბოლო დროს მიმდინარე მოვლენები, მათ შორის ისაუბრეს „ბათუმელებისა“ და „ნეტგაზეთის“ დამფუძნებლის, მზია ამაღლობელის საქმესთან დაკავშირებით და სოლიდარობა  გამოუცხადეს პატიმრობაში მყოფი მედიამენეჯერს, რომელიც დაკავების დღიდან შიმშილობს.

აქციაზე ასევე იმყოფებოდნენ პარტია „გახარია საქართველოსთვის წარმომადგენლები, მათ ხელჭი ეჭირათ ბანერები წარწერით - ,,SHERATON BATUMI HOTEL - დღე 5 კადრები დაიდოს’’.

აქტივისტებმა შეკრების ადგილზე მაშხალაც გაისროლეს.

ორგანიზატორებმა იქ მისულ ადამიანებს უთხრეს, რომ აქციის დაწყების დრო იცვლება და ხვალიდან,  ისინი 18 საათზე შეიკრიბებიან, ნაცვლად 17 საათისა. 

ცნობისთვის,მას შემდეგ, რაც "ქართულმა ოცნებამ"  2024 წლის 28 ნოემბერს გადაწყვიტა, რომ 2028 წლის ბოლომდე საქართველო ევროკავშირთან მოლაპარაკებების გახსნის საკითხს დღის წესრიგში არ დააყენებს, საქართველოს მასშტაბით, თბილისსა და სხვა ქალაქებში, მათ შორის, ზუგდიდში, უწყვეტი პროევროპული საპროტესტო აქციები იმართება.