აფხაზეთის თვითგამოცხადებული რესპუბლიკის ე.წ. პრეზიდენტის მოვალეობის შემსრულებელმა ვალერი ბგანბამ ღია წერილით მიმართა რუსეთის პრეზიდენტს ვლადიმერ პუტინს.
მისი თქმით, ოკუპირებული აფხაზეთის „პრეზიდენტობის“ კანდიდატები „ერთხმად უჭერენ მხარს რუსეთის ფედერაციასთან ძმური ურთიერთობების განვითარებასა და განმტკიცებას“, წერს "აფსნიპრესი". 

„ამავდროულად, სერიოზულ შეშფოთებას იწვევს ის პოლიტიკური დისკურსი, რომელიც ყალიბდება ზოგიერთ რუსულ მედიასაშუალებაში. საკმარისი საფუძვლების გარეშე ამტკიცებენ, რომ აფხაზეთში არსებობენ ძალები, რომლებიც ცდილობენ შეარყიონ ჩვენი ურთიერთობა რუსეთთან. კანდიდატების „პრორუსებად“ და „ანტირუსებად“ დაყოფის მცდელობა ქმნის ჩვენი საზოგადოების დამახინჯებულ სურათს და შეიძლება უარყოფითი გავლენა იქონიოს აფხაზურ-რუსულ მეგობრობაზე“, - აღნიშნა მან.

ბგანბა სთხოვს პუტინს „ყოვლისმომცველი დახმარება აღმოუჩინოს და არ დაუშვას პროცესები, რომლებიც შეიძლება უარყოფითად აისახოს აფხაზეთსა და რუსეთს შორის ხანგრძლივ მეგობრულ კავშირებზე“.

ცნობისთვის, ვალერგი ბგანბა, ე.წ. პრეზიდენტის მოვალეობის შემსრულებელი მას შემდეგ გახდა, რაც ბადრა გუნბა „საპრეზიდენტო“ არჩევნებში მონაწილეობის მისაღებად დარეგისტრირდა და შვებულებაში გავიდა.

ზოგიერთი რუსული მედიასაშუალებები და ტელეგრამის არხები ადგურ არძინბას წარმოადგენენ, როგორც "ანტირუსულ" კანდიდატს.  გარდა ამისა, სრულიად რუსულმა საზოგადოებრივი აზრის კვლევის ცენტრმა (ВЦИОМ) გამოაქვეყნა საზოგადოებრივი აზრის გამოკითხვის შედეგები, რომლის მიხედვითაც „მმართველი პარტიის“ კანდიდატმა ბადრა გუნბამ 32% მიიღო, ხოლო ადგურ არძინბამ 15%.

საზოგადოების ნაწილმა ეს საარჩევნო პროცესზე გავლენის მოხდენის მცდელობად შეაფასა.

ოკუპირებულ აფხაზეთში „საპრეზიდენტო“ არჩევნები 15 თებერვალს გაიმართება. მასში ხუთი კანდიდატი მიიღებს მონაწილეობას:

„პრეზიდენტის“ მოვალეობის შემსრულებელი - ბადრა გუნბა;

აფხაზეთის ყოფილი „სავაჭრო წარმომადგენელი რუსეთის ფედერაციაში“ - ოლეგ ბარციცი;

ეკონომიკის ყოფილი „მინისტრი“ და ოპოზიციური „აფხაზთა სახალხო მოძრაობის“ ლიდერი- ადგურ არძინბა;

„კონტროლის პალატის“ ყოფილი ხელმძღვანელი - რობერტ არშბა ;

კომერციული „შავი ზღვის განვითარების ბანკის“ თავმჯდომარე - ადგურ ხურხუმალი.

აფხაზეთის თვითგამოცხადებული რესპუბლიკის "პრეზიდენტი" ასლან ბჟანია თანამდებობიდან 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.

პასუხად, მოსკოვმა ჯერ ნაწილობრივ, შემდეგ კი სრულად შეუჩერა სოხუმს ბიუჯეტის მოსკოვმა სოხუმს სრულად შეუჩერა დაფინანსება.