ჩხოროწყუს მუნიციპალიტეტის მერია მზრუნველობა მოკლებულების უფასო კვებით უზრუნველსაყოფად ადგილობრივი ბიუჯეტიდან 50 000 ლარს გამოყოფს. ამის შესახებ სახელმწიფო შესყიდვების ვებ გვერდზე ვკითხულობთ.

დოკუმენტაციის მიხედვით, შესაბამისი ტენდერი 35 ბენეფიციარისთვის ყოველდღიური ერთჯერადი კვების მომსახურების გაწევას ითვალისწინებს, ერთ ადამიანზე დღიური ულუფის ღირებულება კი 3.91 ლარი იქნება.

კვირის დღეების მიხედვით, მენიუს ჩამონათვალი კი შემდეგნაირია:

ორშაბათი: ბორში (საქონლის ხორცით), მაკარონის ფაფა, ლიმონათი, პური.

სამშაბათი: თევზი, ვერმიშელის ფაფა, მოხარშული კვერცხი, ლიმონათი, გუფთა, პური.

ოთხშაბათი: ქათმის ჩახოხბილი, მაკარონის ფაფა, ლიმონათი, პური.

ხუთშაბათი: ბორში (საქონლის ხორცით), ფლავი, ლიმონათი, პური.

პარასკევი: ლობიოს წვენი, მაკარონის ფაფა, ფუნთუშა, ლიმონათი, პური.

შაბათი: მაკარონი ფარშით, ბრინჯის ფაფა, კარტოფილის პიურე, ლიმონათი, პური.

კვირა: ქათმის ფრთების ბულიონი, კისელი, მოხარშული კვერცხი, ლიმონათი, პური.

ტენდერში წინადადებები 5-7 თებერვალს მიიღება. შესყიდვაში გამარჯვებული ვალდებული იქნება ხელშეკრულებით გათვალისწინებული მოთხოვნები 2025 წლის 31 დეკემბრის ჩათვლით შეასრულოს.