სოხუმში ჩავიდა რუსეთის პრეზიდენტის ადმინისტრაციის ხელმძღვანელის მოადგილე სერგეი კირიენკო. მანამდე ვრცელდებოდა ინფორმაცია, რომ ის რუსეთის მთავრობაში აფხაზური მიმართულების კურატორად დაინიშნა.
კირიენკო უკვე შეხვდა დე ფაქტო რესპუბლიკის ე.წ. პრეზიდენტის მოვალეობის შემსრულებელს, ვალერი ბგანბას. ამავე ცნობით, შეხვედრას ასევე ესწრებოდა რუსეთის „ელჩი აფხაზეთში“ მიხაილ შურგალინი.

"ბგანბამ და კირიენკომ განიხილეს შემდგომი ურთიერთქმედება და აფხაზეთ-რუსეთის პარტნიორობის საკითხები, ასევე გაცვალეს სუვენირები", - ნათქვამია ოკუპირებული აფხაზეთის დე ფაქტო ლიდერის პრესსამსახურის განცხადებაში.

„ეხო კავკაზას“ თანახმად, სერგეი კირიენკო 1962 წელს სოხუმში დაიბადა. რუსეთში ბორის ელცინის პრეზიდენტობის პერიოდში იყო რუსეთის ფედერაციის მთავრობის თავმჯდომარე, 1998 წლის 24 აპრილიდან 24 აგვისტომდე. 2005 წლიდან 2016 წლამდე ეკავა კორპორაცია "როსატომის" გენერალური დირექტორის თანამდებობა, ხოლო 2016 წლის 5 ოქტომბრიდან რუსეთის პრეზიდენტის ადმინისტრაციის უფროსის პირველი მოადგილეა.

2022 წლიდან "აფხაზეთთან და სამხრეთ ოსეთთან თანამშრომლობის კურატორია" ალექსანდრ ნოვაკი; მანამდე ამ ფუნქციას მარატ ხუსნულინი ასრულებდა.

ოკუპირებულ აფხაზეთში „საპრეზიდენტო“ არჩევნები 15 თებერვალს გაიმართება. მასში ხუთი კანდიდატი მიიღებს მონაწილეობას:

„პრეზიდენტის“ მოვალეობის შემსრულებელი - ბადრა გუნბა;

აფხაზეთის ყოფილი „სავაჭრო წარმომადგენელი რუსეთის ფედერაციაში“ - ოლეგ ბარციცი;

ეკონომიკის ყოფილი „მინისტრი“ და ოპოზიციური „აფხაზთა სახალხო მოძრაობის“ ლიდერი- ადგურ არძინბა;

„კონტროლის პალატის“ ყოფილი ხელმძღვანელი - რობერტ არშბა ;

კომერციული „შავი ზღვის განვითარების ბანკის“ თავმჯდომარე - ადგურ ხურხუმალი.

აფხაზეთის თვითგამოცხადებული რესპუბლიკის "პრეზიდენტი" ასლან ბჟანია თანამდებობიდან 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.

პასუხად, მოსკოვმა ჯერ ნაწილობრივ, შემდეგ კი სრულად შეუჩერა სოხუმს ბიუჯეტის მოსკოვმა სოხუმს სრულად შეუჩერა დაფინანსება.