აფხაზეთის დე ფაქტო რესპუბლიკის ცენტრალურმა საარჩევნო კომისიამ ქალაქ საქარიაში (თურქეთი) საარჩევნო უბნის დახურვის და საუბნო საარჩევნო კომისიის დაშლის გადაწყვეტილება მიიღო, წერს „აფსნიპრესი“

წერილში, რომელიც „თურქეთში რესპუბლიკის სრულუფლებიანი წარმომადგენლის“ იბრაჰიმ ავიძბასგან მიიღო დე ფაქტო ცესკომ, საუბარია 15 თებერვალს დაგეგმილ აფხაზეთის „საპრეზიდენტო“ არჩევნებისთვის თურქეთში საარჩევნო უბნების გახსნის შეუძლებლობის შესახებ. გამოცემის თანახმად, სწორედ ეს შეტყობინება გახდა ამ გადწყვეტილების მიღების საფუძველი. 

მანამდე ტელეგრამის არხმა AMPA-life - მა დაწერა, რომ თურქეთის ხელისუფლებამ „აუკრძალა თურქეთის აფხაზურ დიასპორას კენჭისყრაში მონაწილეობა, მათ შორის საქართველოს ზეწოლის ქვეშ, რომლის საგარეო საქმეთა სამინისტრომ ცოტა ხნის წინ, მათ შესაბამისი ნოტა გაუგზავნა “.

„აფხაზეთის წარმომადგენელი თურქეთში გააფრთხილეს საარჩევნო უბნების გახსნის შესახებ გამოცხადებული აკრძალვის დარღვევის შემთხვევაში, წარმომადგენლობის შესაძლო დახურვის შესახებ“, - ნათქვამია განცხადებაში.

აქვე აღნიშნულია, რომ ოკუპირებული აფხაზეთის ბოლო ე.წ. არჩევნებისთვის საარჩევნო უბნები სტამბოლში გაიხსნა, თუმცა მათ მუშაობას გარკვეული პრობლემები მოჰყვა.

თებერვლის დასწყისში, სოხუმში განაცხადეს, რომ „საპრეზიდენტო“ არჩევნებისთვის ოკუპირებული აფხაზეთის ფარგლებს გარეთ სამი საარჩევნო უბანი გაიხსნება, მათ შორის ერთი - თურქეთის ქალაქ საქარიაში (ადაპზარი), დანარჩენი ორი - მოსკოვსა და ყარაჩაი-ჩერქეზეთის დედაქალაქ ჩერკესკში.

ცმობისთვის, აფხაზეთის დე ფაქტო რესპუბლკაში „პრეზიდენტობისთვის“ 5 კანდიდატი იბრძოლებს:

"პრეზიდენტის" მოვალეობის შემსრულებელი, - ბადრა გუნბა;

ეკონომიკის ყოფილი "მინისტრი", აფხაზი ოპოზიციონერი - ადგურ არძინბა;

ოკუპირებული აფხაზეთის ყოფილი "სავაჭრო წარმომადგენელი მოსკოვში" - ოლეგ ბარციცი;

"კონტროლის პალატის" ყოფილი ხელმძღვანელი - რობერტ არშბა;

კომერციული "შავი ზღვის განვითარების ბანკის" გამგეობის თავმჯდომარე, ადგურ ხურხუმალი.

„საპრეზიდენტო“ არჩევნებში მონაწილეობაზე, ჯანმრთელობის მდგომარეობის გამო, უარი განაცხადა ოპოზიციონერმა „დეპუტატმა“ კან კვარჩიამ.

აფხაზური მედიის ცნობით, თავისი კანდიდატურები ასევე მოხსნეს ბიზნესმენმა ბესლან კვიცინიამ და „სახალხო პარტიის“ლიდერმა შამილ აძინბამ.

ცნობისთვის, ყოფილი “პრეზიდენტი” ასლან ბჟანია თანამდებობიდან 19 ნოემბერს გადადგა, რასაც წინ უსწრებდა ოპოზიციის პროტესტი და ე.წ. პარლამენტში სოხუმსა და მოსკოვს შორის საინვესტიციო ხელშეკრულების რატიფიცირების პროცესის ჩაშლა. მოგვიანებით, ე.წ. პარლამენტმა ჩააგდო რუსულ - აფხაზური საინვესტიციო შეთანხმების რატიფიცირების საკითხი.

ვადამდელი „საპრეზიდენტო“ არჩევნები ოკუპირებულ აფხაზეთში 2025 წლის 15 თებერვალს გაიმართება.