აფხაზეთის დე ფაქტო რესპუბლიკის „სახელმწიფო უსაფრთხოების სამსახურის“ უფროსი დიმიტრი კუჩუბერია თანამდებობიდან გაათავისუფლეს. შესაბამის განკარგულებას ხელი „პრეზიდენტის“ მოვალეობის შემსრულებელმა ვალერი ბგანბამ მოაწერა. 
ამავე ცნობით, მისი მოვალეობის დროებით შესრულება ალხას ჩიჩბას დაეკისრა.

„ეხო კავკაზას“ თანახმად, გადადგომის მიზეზი არ დასახელებულა.

ამავე ცნობით, ბგანბამ 17 თებერვალს, „უშიშროების ძალებთან“ შეხვედრა გამართა, რომელიც ეძღვნებოდა „საპრეზიდენტო არჩევნების პირველი ტურის შემდეგ ქვეყანაში არსებულ რთულ სოციალურ-პოლიტიკურ ვითარებას“. კერძოდ, დისკუსია შეეხო, ბგანბას და სომხური თემის წარმომადგენლების მიმართ მუქარას.


შეხვედრაზე, სომხური თემის თავმჯდომარემ, ალიკ მინოსიანმა ისაუბრა ბოლო რამდენიმე დღის განმავლობაში, „სომხების, სოფლის ადმინისტრაციის ხელმძღვანელების და მოსახლეობის დაშინების ფაქტებზე".

სამართალდამცავი ორგანოების ხელმძღვანელებმა განაცხადეს, რომ „ჩაატარებენ შესაბამის გამოძიებას და მიიღებენ ზომებს მსგავსი უკანონო ქმედებების აღსაკვეთად“.

აქვე აღინიშნა, რომ „წინასაარჩევნო კამპანიის“ განმავლობაში შვებულებაში ბევრი თანამდებობის პირი იყო გასული. ვალერი ბგანბას თქმით, ერთი თვე უკვე გავიდა. ამასთან დაკავშირებით, მან ე.წ. პრეზიდენტის ადმინისტრაციის ხელმძღვანელს, ზურაბ ქაჯაის, მიმართა თხოვნით, "შეამოწმოს რომელი თანამდებობის პირები არ გამოცხადდნენ სამსახურში".

„პრეზიდენტობის“ კანდიდატმა ბადრა გუნბამ განაცხადა, რომ ვალერი ბგანბას გადაწყვეტილება „სახელმწიფო უსაფრთხოების სამსახურის“ ახალი ხელმძღვანელის დანიშვნის თაობაზე, გასული წლის ნოემბერში ოპოზიციასთან მიღწეული შეთანხმებების დარღვევაა.

„მე ვთვლი, რომ ვალერი ბგანბამ დაკარგა როგორც მორალური, ისე პოლიტიკური უფლება, განაგრძოს აფხაზეთის პრეზიდენტის მოვალეობის შესრულება“, - განაცხადა გუნბამ და დასძინა, რომ ე.წ. პრეზიდენტის მოვალეობა ე.წ. პარლამენტის სპიკერმა უნდა შეასრულოს.

განცხადება ასევე გაავრცელა "პარტიათა და საზოგადოებრივი ორგანიზაციების კავშირმა", რომელშიც ნათქვამია, რომ „ოპოზიციის წარმომადგენლებმა უხეშად დაარღვიეს ხელმოწერილი ხელშეკრულებები“.

ისინი მიჩნევენ, რომ ბგანბამ, „პრეზიდენტობის“ კანდიდატის ადგურ არძინბას დავალებით, გამოსცა განკარგულება „აფხაზეთის რესპუბლიკის სახელმწიფო უსაფრთხოების სამსახურის თავმჯდომარის თანამდებობიდან გადაყენების შესახებ“. მათივე თქმით, არსებობს ინფორმაცია, რომ „მზადდება სხვა საკადრო განკარგულებები“.

„შეთანხმების დარღვევის შედეგებზე მთელი პასუხისმგებლობა ეკისრება ვალერი ბგანბას და მის გარემოცვას“, - ნათქვამია კავშირის განცხადებაში.

აფხაზური მედიის თანახმად, ბგანბა დე ფაქტო მთავრობის მეთაურის მოვალეობას 2024 წლის 20 ნოემბრიდან ასრულებს. მისი კანდიდატურა შეთანხმებული იყო ოპოზიციასთან, რომელმაც აფხაზი ლიდერის ასლან ბჟანიას გადადგომას მიაღწა. ამავ დროს, პროტესტის შედეგად, რომელშიც "პრეზიდენტობის" კანდიდატი ადგურ არძინბა მონაწილეობდა, ე.ს. პარლამენტმა ჩააგდო მოსკოვსა და სოხუმს შორის საინვესტიციო შეთანხმების რატიფიცირების პროცესი. 

ცნობისთვის, „საპრეზიდენტო“ არჩევნების მეორე ტურში, რომელიც ოკუპირებულ აფხაზეთში 1 მარტს გაიმართება, მონაწილეობას ორი კანდიდატი მიიღებს, ასლან ბჟანიას თანაგუნდელი - ბადრა გუნბა და აფხაზი ოპოზიციონერი, ადგურ არძინბა.


ვადამდელი „საპრეზიდენტო“ არჩევნები, აფხაზეთში,15 თებერვალს გაიამრთა.