ზუგდიდში საპროტესტო შინაარსის სტენსილების ავტორსა და სამოქალაქო აქტივისტს როსტომ ზარანდიას პოლიცია ადმინისტრაციულ სამართალდარღვევათა კოდექსის 150-ე მუხლის მე-2 ნაწილის დარღვევას ედავება, რაც მუნიციპალიტეტის ტერიტორიის იერსახის დამახინჯებას გულისხმობს. შესაბამისი ვიდეო მასალა აქტივისტმა საკუთარ ფეისბუქ გვერდზე გაავრცელა, რომელშიც ნაჩვენებია, რომ პოლიციელებმა სამართალდარღვევის ოქმი მას სახლში მიუტანეს.

რადიო „ათინათთან“ ზარანდია განმარტავს, რომ მას გამოძიება ზუგდიდის რაიონული პროკურატურის შენობაზე "ნეტგაზეთისა“ და „ბათუმელების“ თანადამფუძნებლის, მზია ამაღლობელის სტენსილის მიხატვას ედავება.

„მათ საპროტესტო მესიჯების ეშინიათ და ახლა წინააღმდეგობის კონტექსტში, ცდილობენ, რომ ჩვენი ხმა ჩაახშონ. სინამდვილეში, მათ იერსახე არ აწუხებთ, აწუხებთ ის, რომ მესიჯი მიდის ხალხთან და ხალხი უნდა იყოს სიბნელეში. ამათი დაკვეთაა გავიხლიჩოთ და ერთმანეთის არ გვესმოდეს, გაგვთიშონ და ერთმანეთთან არ გვალაპარაკონ. ისინი ცდილობენ, რომ დაგვაპირისპირონ. სასამართლო უნდა ჩაინიშნოს და მან უნდა გადაწყვიტოს რამდენი ლარით უნდა დავჯარიმდე. მე კანონდამრღვევი არ ვარ, არ ვამახინჯებ იერსახეს. ისინი ამახინჯებენ, მე ვხატავ, ხოლო ისინი გადაღებავენ ხოლმე შავად ნახატებს“, - ამბობს ის.

სამოქალაქო აქტივისტის თქმით, მას სასამართლოს მიერ სამართლიანი გადაწყვეტილების მიღების იმედი არ აქვს, თუმცა, როგორც ამბობს, ცალკეული მოსამართლე თუ გაბედავს ობიექტური გადაწყვეტილების მიღებას, მიესალმება.

ქართული ოცნების" საკანონმდებლო ცვლილებების მიხედვით, „სხვადასხვა სახის წარწერების, ნახატების, სიმბოლოების თვითნებურად შესრულება ადმინისტრაციული ორგანოების შენობათა ფასადებზე, აგრეთვე მათ მიმდებარე ტერიტორიაზე, მათ შორის, ფეხით მოსიარულეთა და სატრანსპორტო საშუალებების სავალ ნაწილზე“ ითვალისწინებს 2 000 ლარის ოდენობით დაჯარიმებას.