ოკუპირებული აფხაზეთის ე.წ. პრეზიდენტის მოვალეობის შემსრულებელმა ვალერი ბგანბამ ოთხშაბათს, 19 თებერვალს, ხელი მოაწერა ბრძანებას ე.წ. საპრეზიდენტო არჩევნების დასრულებამდე, 18 წლის და უფროსი ასაკის “აფხაზეთის მოქალაქეების” პასპორტების გაცემისა და რეგისტრაციის შეჩერების შესახებ, წერს „აფსნიპრესი“.
მანამდე, 18 თებერვალს, ბგანბამ თანამდებობიდან გაათავისუფლა აფხაზეთის დე ფაქტო რესპუბლიკის „სახელმწიფო უსაფრთხოების სამსახურის“ უფროსი დიმიტრი კუჩუბერია, თუმცა გადაწყვეტილების მიზეზები არ დაუსახელებია.

“პრეზიდენტობის” კანდიდატმა ბადრა გუნბამ დე ფაქტო სუსი - ს ხელმძღვანელის თანამდებობიდან გადაყენება „ხელისუფლებასა“ და ოპოზიციას შორის შეთანხმების დარღვევად და “საპრეზიდენტო” არჩევნების მეორე ტურის ჩაშლის მცდელობად შეაფასა.

თავის მხრივ, „პრეზიდენტობის“ ოპოზიციურმა კანდიდატმა ადგურ არძინბამ განაცხადა, რომ სოხუმში იმყოფება რამდენიმე ათეული შეიარაღებული პირი, „აფხაზეთის მოქალაქეობის გარეშე“ და ძალოვან სტრუქტურებს მათი რესპუბლიკიდან გაძევება მოსთხოვა.

19 თებერვალს, ბგანბამ დეზინფორმაცია უწოდა გავრცელებულ ცნობას იმის შესახებ, რომ უკრაინაში მებრძოლ აფხაზ მოხალისეებს აფხაზეთში შესვლა ეკრძალებათ. მანამდე სოციალურ ქსელებში გავრცელდა ინფორმაცია, უკრაინაში რუსეთის მხარეს მებრძოლ აფხაზ მებრძოლთა რაზმის მეთაურზე ახრა ავიძბაზე თავდასხმის შესახებ.

ოკუპირებულ აფხაზეთში „საპრეზიდენტო“ არჩევნების მეორე ტური 1 მარტს გაიმართება, მასში მონაწილეობას ორი კანდიდატი მიიღებს, ასლან ბჟანიას თანაგუნდელი - ბადრა გუნბა და აფხაზი ოპოზიციონერი, ადგურ არძინბა.

ვადამდელი "საპრეზიდენტო" არჩევნები დე ფაქტო რესპუბლიკაში 15 თებერვალს გაიმართა, მასში კენჭს 5 კანდიდატი იყრიდა.