აფხაზური “საექსპორტო“ მიმოზის რუსეთში შეტანა აიკრძალა. რუსეთის საკარანტინო სამსახურის ინფორმაციით, მიმოზაში კალიფორნიული ყვავილოვანი თრიპსი აღმოაჩინეს, წერს „აფსნიპრესი“.

აფხაზეთის დე ფაქტო რესპუბლიკის საკარანტინო სამსახურის უფროსი ომარ ცვიჟბა თვლის, რომ ასეთ დაბალ ტემპერატურაზე თრიპსის არსებობა ნაკლებად სავარაუდოა.

„ასეთ პირობებში თრიპსის გამოვლენა შეუძლებელია. ხვალიდან დავიწყებთ მის დეტალურ შესწავლას ლაბორატორიაში“, - განაცხადა მან.

მანამდე, ტელეგრამის არხები წერდნენ, რომ ფსოუს ე.წ. საზღვარზე რამდენიმე დღეა მიმოზით დატვირთული ათობით, მათ შორის, სატვირთო მანქანა დგას. ისინი რუსეთში საქონლის გატანის ნებართვას ელოდებიან.

მათივე ცნობით, რუსულმა მხარემ მოულოდნელად მიიღო გადაწყვეტილება, აფხაზური მიმოზის რუსეთში შეტანის აკრძალვის შესახებ. ამავე ცნობით, მოქალაქეების ნაწილი, პირდაპირ ე.წ. საზღვარზე ტოვებს მიმოზით სავსე ტომრებს, რადგან

რუსეთის მხარეს მხოლოდ მცირე პარტიების, 5 კგ- მდე, გადატანაა ნაბადართული. 

გამოცემის თანახმად, 2024 წლის 6 დეკემბერს, რუსეთის საკარანტინო სამსახურმა აფხაზეთიდან რუსეთში „ექსპორტირებული“ ციტრუსის ერთ-ერთ პარტიაში ასევე აღმოაჩინა კალიფორნიული თრიფსი.